India Tourism : दरवर्षी ३१ ऑक्टोबर रोजी लोहपुरुष सरदार वल्लभभाई पटेल यांची जयंती एकता दिन म्हणून साजरी केली जाते. तुम्ही देखील या दिवशी गुजरातमधील केवडिया स्टॅच्यू ऑफ युनिटीला भेट देण्याचा विचार नक्कीच करू शकतात. तसेच गुजरातमध्ये पर्यटनाची अनेक केंद्रे असली तरी, भारताचे पहिले उपपंतप्रधान आणि पहिले गृहमंत्री सरदार वल्लभभाई पटेल यांना समर्पित स्टॅच्यू ऑफ युनिटी हे सर्वात लोकप्रिय पर्यटन स्थळांपैकी एक बनले आहे. जर तुम्हाला सरदार पटेल यांची जयंती संस्मरणीय बनवायची असेल, तर स्टॅच्यू ऑफ युनिटीला नक्की भेट द्या. येथे इतिहास, निसर्ग आणि देशभक्तीचे परिपूर्ण मिश्रण आहे.
स्टॅच्यू ऑफ युनिटी खास का आहे?
सरदार सरोवर धरणापासून साडेतीन किलोमीटर अंतरावर साधू बेट नावाच्या ठिकाणी सरदार पटेलांचे हे स्मारक आहे, हे विशेष. हा जगातील सर्वात उंच पुतळा आहे ज्याची उंची 182 मीटर आहे. यानंतर, जगातील दुसरी सर्वात उंच मूर्ती चीनमधील स्प्रिंग टेंपल बुद्ध आहे, ज्याची पायासह एकूण उंची 153 मीटर आहे. गुजरातचे मुख्यमंत्री म्हणून नरेंद्र मोदी यांनी या स्मारकाची कल्पना केली होती आणि 31 ऑक्टोबर 2013 रोजी सरदार पटेल यांच्या वाढदिवसानिमित्त या विशाल पुतळ्याच्या बांधकामाची पायाभरणी केली होती. त्यानंतर 31 ऑक्टोबर 2018 रोजी पंतप्रधान म्हणून नरेंद्र मोदी यांनी त्याचे उद्घाटन केले.
ही मूर्ती बनवण्यासाठी भारतभरातील खेड्यापाड्यात राहणाऱ्या शेतकऱ्यांकडून शेतीसाठी वापरण्यात येणारी जुनी आणि अप्रचलित अवजारे गोळा करून लोखंड गोळा करण्यात आले. या मोहिमेला ‘स्टॅच्यू ऑफ युनिटी कॅम्पेन’ असे नाव देण्यात आले. 3 महिने चाललेल्या या मोहिमेत सुमारे 6 लाख ग्रामस्थांनी मूर्ती स्थापनेसाठी लोखंड दान केल्याचे सांगण्यात येते. या काळात सुमारे पाच हजार मेट्रिक टन लोखंड जमा झाले. स्टॅच्यू ऑफ युनिटी हा स्टील मोल्ड, प्रबलित काँक्रीट आणि कांस्य कोटिंगचा बनलेला आहे. या स्मारकाच्या वैशिष्ट्यांबद्दल सांगायचे तर, स्मारकापर्यंत जाण्यासाठी लिफ्ट आहे. याशिवाय, छतावर एक स्मारक उद्यान, एक विशाल संग्रहालय आणि प्रदर्शन हॉल आहे ज्यात सरदार पटेल यांचे जीवन आणि योगदान दर्शवले आहे. यासोबतच नदीपासून 500 फूट उंचीचा ऑब्झर्व्हर डेकही बांधण्यात आला असून त्यामध्ये एकाच वेळी दोनशे लोक मूर्तीचे निरीक्षण करू शकतात. येथे एक आधुनिक सार्वजनिक प्लाझा देखील बांधण्यात आला आहे, ज्यातून नर्मदा नदी आणि मूर्ती पाहता येते. यामध्ये फूड स्टॉल्स, गिफ्ट शॉप्स, रिटेल आणि इतर सुविधांचा समावेश आहे. स्टॅच्यू ऑफ युनिटी स्मारक दर सोमवारी देखभालीसाठी बंद ठेवले जाते.
स्टॅच्यू ऑफ युनिटी जावे कसे?
स्टॅच्यू ऑफ युनिटी एकता नगर पूर्वी केवडिया, गुजरात येथे आहे. तुम्ही येथे अनेक मार्गांनी पोहोचू शकता.
विमान मार्ग- वडोदरा विमानतळ सुमारे ९१ किमी अंतरावर आहे
रेल्वे मार्ग- वडोदरा ते एकता नगर नियमित गाड्या धावतात
रस्ता मार्ग- वडोदरा शहरात पोहचल्यानंतर टॅक्सी किंवा बसने २ तासांत सहज पोहोचता येते. तसेच वडोदराहून एकता नगरला पोहोचल्यानंतर, ३.५ किमी लांबीचा महामार्ग आणि नंतर ३२० मीटर लांबीचा पूल स्टॅच्यू ऑफ युनिटीकडे जातो.
