बॉलिवूडचा मिस्टर परफेक्शनिस्ट अभिनेता आमिर खानच्या ‘पीके’ने बॉक्स ऑफिसवर धुमाकूळ घातला आहे. रेकॉर्डब्रेक कमाई करणार्‍या ‘पीके’ सिनेमानंतर, आमिर आता आणखी कोणता नवा प्रयोग करणार, याचं उत्तर आता मिळालं आहे.
आमिर खान आता आगामी ‘कुश्ती’ या सिनेमात चक्क पैलवानाची भूमिका साकारणार आहे. हा सिनेमा सत्य घटनेवर आधारित आहे. आमिर खान हरियाणातील पैलवान महावीर फोगाट यांची भूमिका साकारणार आहे. महावीर यांनी त्यांच्या मुलींना कुस्तीचं प्रशिक्षण दिलं होतं. गीता आणि बबिता या त्यांच्या मुलींनी आंतरराष्ट्रीय स्पर्धा गाजवून अनेक पदकं मिळवली. महावीर यांचा संघर्ष ‘कुश्ती’ या सिनेमाच्या माध्यमातून मांडण्यात येणार आहे. यापूर्वी आमिर खानने दोन्ही बहिणींच्या कार्याने प्रभावित होऊन, त्यांना ‘सत्यमेव जयते’ या कार्यक्रमातही आमंत्रित केलं होतं. ‘कुश्ती’ या सिनेमाचं दिग्दर्शन नीतेश तिवारी करणार असल्याची चर्चा आहे. नीतेश यांनी ‘चिल्लर पार्टी’ आणि ‘भूतनाथ रिटर्न्‍स’ या सिनेमांचं दिग्दर्शन केलं आहे.
