टीम इंडियाचा कॅप्टन कूल महेंद्रसिंग धोनीच्या आयुष्यावर आधारित चित्रपटातील मुख्य अभिनेत्रीचा शोध अखेर संपला आहे. दिग्दर्शक नीरज पांडेने साक्षीच्या भूमिकेसाठी अभिनेत्री कियारा अडवाणीच्या नावावर शिक्कामोर्तब केलं आहे. कियाराने फग्ली चित्रपटातून बॉलीवूडमध्ये पदार्पण केलं होतं. त्यानंतर ‘एम एस धोनी’ हा तिचा दुसराच चित्रपट असेल. दुसर्‍याच चित्रपटात इतकी चांगली भूमिका मिळाल्यामुळे कियारा अत्यंत उत्साहात आहे. ‘फग्ली’नंतर मी चांगल्या भूमिकांच्या शोधात होते. या चित्रपटामुळे माझी इच्छा पूर्ण झाली, अशी प्रतिक्रिया कियाराने दिली आहे. कियाराला माही आणि साक्षी यांची भेट घेण्याचीही इच्छा आहे.
चित्रपटात सुप्रसिद्ध अभिनेता सुशांत सिंग राजपूत महेंद्रसिंग धोनीची व्यक्तिरेखा साकारणार आहे. साक्षीच्या भूमिकेसाठी परिणिती चोप्रा, कृती सॅनॉन यांच्या नावांचाही विचार सुरू होता. मात्र ही भूमिका अखेर कियाराच्या पदरात पडली. दिग्दर्शक नीरज पांडेचे ‘अ वेनसडे’ आणि ‘स्पेशल 26’ सारखे चित्रपट सुपरहिट झाले आहेत. धोनीवरील चित्रपट 2015 मध्ये प्रदर्शित होणार आहे.
