प्रियांका चोप्रा आणि दीपिका पदुकोण दोघीही बॉलिवूडमधील आघाडीच्या अभिनेत्री. अव्वल स्थानावर असल्याने दोघीही एकमेकांच्या कट्टर प्रतिस्पर्धी. मात्र असे असतानाही त्या दोघी एकमेकांच्या चांगल्या मैत्रिणी आहेत. याबाबतची कबुली खुद्द दीपिकानेच दिलीय. बॉलिवूड जगतात समोरच्यावर कुरघोडी करून पुढे कसे जाता येईल याबाबत अभिनेत्रींमध्ये स्पर्धा सुरू असते. त्यामुळे त्यांच्यात मैत्री होणे ही दूरची गोष्ट. असे असतानाही प्रियांका आणि दीपिका एकमेकांच्या चांगल्या मैत्रिणी आहेत. दोघींमधील केमिस्ट्री किती चांगली आहे हे ‘पिंगा’ या गाण्यातून दिसून येतेच. इतकेच नव्हे तर बॉलिवूड जगतात आपली सर्वात पहिली मैत्री झाली ती प्रियांकाशी अशी कबुली दीपिकाने दिली आहे. जेव्हा मी या इंडस्ट्रीमध्ये प्रवेशही केला नव्हता तेव्हा मला प्रियांका भेटली. ती माझी
बॉलिवूडमधील पहिली मैत्रीण आहे, असे दीपिकाने सांगितले. यामुळेच की काय ‘बाजीराव मस्तानी’च्या शूटिंगच्या वेळी प्रियांका आणि दीपिकाला कोणतीही अडचण आली नाही. आम्ही दोघीही चांगल्या मैत्रिणी असल्याने ‘बाजीराव मस्तानी’च्या शूटिंगदरम्यान कोणतीही अडचण आली नाही, असेही दीपिकाने नमूद केले आहे.
