हरियाणातील गुरुग्राम येथील प्रसिद्ध युट्यूबर एल्विश यादव यांच्या घरी गोळीबार झाल्याची घटना समोर आली आहे. ही घटना पहाटे साडेपाचच्या सुमारास घडली. एल्विश यादव यांच्या घरी गोळीबार झाला तेव्हा त्यांची आई सुषमा यादव घरी उपस्थित होती. सेक्टर 56 पोलिस स्टेशन घटनास्थळी या प्रकरणाचा तपास करत आहे.
मिळालेल्या माहितीनुसार, गुरुग्राममधील वजीराबाद गावात एल्विश यादव यांच्या घरावर दुचाकीवरून आलेल्या अज्ञात हल्लेखोरांनी सुमारे 24 राउंड गोळीबार केला. गोळीबार सुरू होताच, एल्विश यादव यांच्या घरी केअरटेकर म्हणून काम करणारा व्यक्ती घाबरून आत पळून गेला. त्याने एल्विश यादव यांचे वडील मास्टर राम अवतार यांनाही माहिती दिली.
मास्टर राम अवतार यांनी सांगितले की, हल्लेखोरांनी गोळ्या झाडल्या आणि पळून गेले. गोळीबाराच्या वेळी एल्विश यादव घरी नव्हते. तीन हल्लेखोर दुचाकीवरून आले होते, एक हल्लेखोर थोड्या अंतरावर दुचाकीवरून उतरला आणि दोन मुलांनी एकामागोमाग गोळ्या झाडल्या.
एल्विशच्या वडिलांनी पोलिसांना माहिती दिली. माहिती मिळताच पोलिसांनी घटनास्थळी पोहोचून तपास सुरू केला. पोलिस या प्रकरणाचा तपास करत आहेत, आम्हाला पोलिसांच्या कारवाईवर पूर्ण विश्वास आहे.
एल्विश यादव याच्या घराच्या भिंतीवर गोळ्यांचे निशाण आहेत . घरात बसवलेल्या सीसीटीव्हीमध्ये हा हल्लेखोर कैद झाला आहे. पोलिसांनी सीसीटीव्ही कॅमेऱ्यांचा डीव्हीआर जप्त केला आहे. एल्विश यादवच्या घराजवळ पोलिस बंदोबस्त तैनात करण्यात आला आहे.
