New Zealand vs Netherlands World Cup 2023 : विश्वचषक स्पर्धेच्या सलामीच्या सामन्यात गतविजेत्या इंग्लंडचा पराभव करणाऱ्या न्यूझीलंडने विजयी घोडदौड कायम ठेवत नेदरलँड्सचा 99 धावांनी पराभव केला.
न्यूझीलंडचा विश्वचषकातील नेदरलँड्सवरचा हा दुसरा विजय आहे. यापूर्वी 1996 मध्ये दोन्ही संघ आमनेसामने आले होते, ज्यामध्ये न्यूझीलंडने 119 धावांनी विजय मिळवला होता. न्यूझीलंडच्या विजयाचा हिरो ठरला तो मिचेल सँटनर. प्रथम त्याने 17 चेंडूत 36 धावांची खेळी केली आणि नंतर 59 धावांत पाच विकेट्स घेतल्या. या विश्वचषकात कोणत्याही गोलंदाजाची ही पहिली पाच विकेट आहे.नेदरलँडचा हा सलग दुसरा पराभव आहे. हैदराबादमध्येच गेल्या सामन्यात पाकिस्तानने त्यांचा पराभव केला होता.
किवी फिरकीपटू सँटनरने पाच विकेट घेत इतिहास रचला. न्यूझीलंडसाठी विश्वचषकात पाच बळी घेणारा तो पहिला डावखुरा फिरकी गोलंदाज आहे. याआधी जगातील केवळ दोनच खेळाडूंना ही कामगिरी करता आली आहे. भारताचा माजी अष्टपैलू खेळाडू युवराज सिंगने 2011 मध्ये आयर्लंडविरुद्ध बंगळुरूमध्ये 31 धावांत पाच विकेट घेतल्या होत्या. त्याचवेळी बांगलादेशचा कर्णधार शकीब अल हसनने 2019 मध्ये अफगाणिस्तानविरुद्ध साउथम्प्टनमध्ये 29 धावांत पाच विकेट घेतल्या होत्या.
नेदरलँडचा कर्णधार स्कॉट एडवर्ड्सने नाणेफेक जिंकून संथ खेळपट्टीवर न्यूझीलंडला फलंदाजीसाठी आमंत्रित केले. डेव्हॉन कॉनवे आणि विल यंग यांनी पहिल्या 10 षटकात 63 धावा करून चांगली सुरुवात केली, परंतु दक्षिण आफ्रिकेकडून खेळणाऱ्या रॉल्फ वँडर मर्वेने 32 धावांच्या वैयक्तिक धावसंख्येवर कॉनवेला बाद केले. या दोघांनी पहिल्या विकेटसाठी 67 धावांची भागीदारी केली. येथून रचिन रवींद्रने इंग्लंडविरुद्ध येथेही आपला फॉर्म कायम ठेवला. रचिन आणि विल यंग यांनी दुसऱ्या विकेटसाठी 84 चेंडूत 77 धावांची भागीदारी केली. यंगने या काळात वनडेतील सहावे अर्धशतक पूर्ण केले. त्याला व्हॅन मीकरेनने बाद केले. त्याने 70 धावा केल्या.
