हरियाणामध्ये भाजपला बहुमत मिळाले आहे. यासह भाजप हरियाणात विजयाची हॅट्ट्रिक करण्यासाठी सज्ज झाला आहे. तर जम्मू-काश्मीरमध्ये काँग्रेस आघाडीने बहुमताचा आकडा पार केला आहे.
भारतीय जनता पक्षाला पुन्हा एकदा स्पष्ट बहुमत दिल्याबद्दल मी हरियाणाच्या जनतेला सलाम करतो, असे पंतप्रधान मोदींनी ट्विटरवर पोस्ट केले. विकास आणि सुशासनाच्या राजकारणाचा हा विजय आहे. मी येथील जनतेला खात्री देतो की, त्यांच्या आकांक्षा पूर्ण करण्यासाठी आम्ही कोणतीही कसर सोडणार नाही. या महान विजयासाठी मी माझ्या सर्व सहकाऱ्यांचे अभिनंदन करतो ज्यांनी अथक परिश्रम केले आणि पूर्ण समर्पण केले! तुम्ही राज्यातील जनतेची केवळ सेवाच केली नाही, तर आमचा विकासाचा अजेंडा त्यांच्यापर्यंत पोहोचवला आहे. त्याचाच परिणाम म्हणून हरियाणात भाजपने हा ऐतिहासिक विजय मिळवला आहे.
हरियाणा विधानसभा निवडणुकीत विजयानंतर भाजपच्या दिल्ली मुख्यालयात जल्लोषाचे वातावरण आहे. भाजप खासदार रविशंकर प्रसाद म्हणाले की, हरियाणात तिसऱ्यांदा ऐतिहासिक विजय मिळाला आहे. निर्णायक बहुमत मिळाले. हरियाणातील पंतप्रधान मोदींची लोकप्रियता आणि त्यांच्यावरील विश्वासाचा हा विजय आहे. मी सर्वांचे अभिनंदन करतो. जम्मू-काश्मीरमध्ये लोकशाहीचा विजय झाला आहे. तेथेही भाजपने चमकदार कामगिरी केली आहे.
