China Floods:बीजिंगमध्ये मुसळधार पावसाचा उद्रेक, पुरामुळे आतापर्यंत 30 जणांचा मृत्यू

चीनची राजधानी बीजिंग सध्या भीषण पूर आणि पावसाच्या विळख्यात सापडली आहे. गेल्या काही दिवसांपासून सुरू असलेल्या मुसळधार पावसामुळे जनजीवन विस्कळीत झाले आहे. बीजिंगच्या महानगरपालिका पूर नियंत्रण मुख्यालयाच्या म्हणण्यानुसार, आतापर्यंत 30 जणांना आपला जीव गमवावा लागला आहे.

तर 80,000 हून अधिक लोकांना सुरक्षित ठिकाणी हलवण्यात आले आहे. जीवित आणि मालमत्तेचे नुकसान कमी करण्यासाठी मदत आणि बचाव कार्य वेगवान करण्याचे निर्देश राष्ट्रपती शी जिनपिंग यांनी दिले आहेत.

बीजिंगमधील ज्या भागात सर्वाधिक मृत्यू झाले आहेत, त्यात मियुन जिल्हा सर्वाधिक प्रभावित झाला आहे. येथे 28 जणांचा मृत्यू झाल्याची पुष्टी झाली आहे, तर यानजिंग जिल्ह्यात दोन जणांचा मृत्यू झाला आहे. स्थानिक अधिकाऱ्यांच्या मते, मियुनमध्ये सर्वाधिक 543.4 मिमी पाऊस पडला. या भागात पूर आणि भूस्खलनाच्या घटनाही घडल्या आहेत.

मुसळधार पाऊस आणि पुरामुळे बीजिंगमधील 31 रस्त्यांचे नुकसान झाले आहे. याशिवाय 136 गावांमध्ये वीजपुरवठा खंडित झाला आहे. प्रशासनाने लोकांना जलद वाहणाऱ्या नद्या आणि धोकादायक भागांपासून दूर राहण्याचा इशारा दिला आहे.

Edited By - Priya Dixit