Webdunia - Bharat's app for daily news and videos

Install App

Select Your Language

Notifications

webdunia
webdunia
webdunia
webdunia

ट्रकचा मोठा अपघात; 49 जण जागीच ठार, 58 जण जखमी

webdunia
शुक्रवार, 10 डिसेंबर 2021 (12:50 IST)
दक्षिण मेक्सिकोत ट्रक उलटून 49 जणांचा मृत्यू झाला असून 58 जण जखमी झाले आहेत. स्थानिक प्रशासनानं या अपघाताबद्दल ही माहिती दिली आहे. चियापासजवळील ब्रिजजवळ ज्यावेळी हा अपघात झाला, त्यावेळी जवळपास 100 स्थलांतरित लोक ट्रकमध्ये होते. हे लोक मध्य अमेरिकेतील होते.
 
या अपघातानंतर रस्त्यावर सर्वत्र मृतदेह पसरले होते. अपघातातील दुखापत झालेल्या जवळपास 58 जणांना हॉस्पिटलमध्ये नेण्यात आल्याची माहिती चियापस सिव्हिल प्रोटेक्शन एजन्सीचे लुईस मॅन्यएल ग्रासिया यांनी दिली.
 
त्यांच्या माहितीनुसार, या अपघतात प्रौढ स्त्री-पुरुषांसह लहान मुलंही होती. या ट्रकमधील लोक होंडुरासमधील स्थलांतिरत होते. स्थलांतरितांना वाहून नेणारा हा ट्रक वळणावर घसरला आणि चियापास राज्याची राजधानी टक्स्टला गुटेरेझकडे जाणाऱ्या रस्त्यारील फूटपाथवर जाऊन धडकला.
 
कागदपत्र नसलेल्या स्थलांतरितांचं सर्वात मोठं ट्रान्झिट पॉईंट म्हणून चियापासची ओळख आहे. मध्य अमेरिकेतील गरिबी आणि हिंसेला कंटाळून शेकडो लोक दरवर्षी मेक्सिकोमार्गे स्थलांतर करत अमेरिकेत पोहोचतात. अनेकजण स्मगलर्सना पैसे देऊन स्थलांतर करतात. मात्र, एकाच वाहनात अनेकांना कोंबून असे वाहून नेले जाते, जे अत्यंत धोकादायक ठरतं.
 
मेक्सिकोचे अध्यक्ष अँड्रेझ मॅन्युएल लोपेझ ओब्रॅडर यांनी या दुर्घटनेबाबत म्हटलं की, अत्यंत वेदनादायी घटना आहे. तसंच, या घटनेबद्दल अत्यंत वाईट वाटतंय, असंही त्यांनी ट्विटरवर लिहिलंय.
 
चियापासचे गव्हर्नर रॅटिलियो एस्कॅंडन यांनी पीडितांच्या कुटुंबियांना शोक व्यक्त केला आणि अपघातासाठी जबाबदार असलेल्यांवर कारवाई करण्याचे आश्वासन दिले. मृतांची ओळख अद्याप पूर्णपणे पटलेली नाही. शवविच्छेदन अहवाल आल्यानंतरच मृतदेह नातेवाईकांच्या ताब्यात देण्यात येणार आहेत.

Share this Story:

Follow Webdunia marathi

पुढील लेख

मुंबईच्या महापौरांना मारण्याची धमकी