रविवारी पाकिस्तानात प्रचंड राजकीय आंदोलन झाले, राजधानी इस्लामाबादमध्ये केवळ राजकीय घडामोडीच झाल्या नाहीत तर सुबा-ए-पंजाबमध्येही राजकीय नाट्य पाहायला मिळाले. पंजाब प्रांताच्या विधानसभेत रविवारी महिला आमदार एकमेकांना भिडले. त्याचा व्हिडिओ सोशल मीडियावर मोठ्या प्रमाणात शेअर केला जात आहे. डॉन न्यूजने शेअर केलेल्या या व्हिडिओमध्ये महिला एकमेकांशी भांडताना दिसत आहेत.
पंजाब हे पाकिस्तानचे सर्वात महत्वाचे राज्य आहे. रविवारी इस्लामाबादमध्ये पाकिस्तान संसदेचे कामकाज सुरू होण्यापूर्वीच इम्रान खान यांनी पंजाबचे राज्यपाल चौधरी सरवर यांची हकालपट्टी केली. याआधी मुख्यमंत्री उस्मान बुजदार यांनी राजीनामा दिला होता.
रविवारी पंजाब विधानसभेचे नवीन सभागृह नेते आणि मुख्यमंत्री निवडण्यासाठी अधिवेशन बोलावण्यात आले होते. मात्र नॅशनल असेंब्लीप्रमाणे पंजाब विधानसभेचे कामकाजही मतदानाशिवाय ६ एप्रिलपर्यंत तहकूब करण्यात आले. अधिवेशन तहकूब झाल्यानंतर सरकार आणि विरोधकांचे आमदार एकमेकांना भिडले, त्यात महिला आमदारांचाही समावेश आहे.
या व्हिडिओमध्ये सत्ताधारी आणि विरोधी पक्षाच्या महिला आमदार समोरासमोर असून एकमेकांना धक्काबुक्की करताना दिसत आहेत. सभागृहात गदारोळ सुरू असून आमदार एकमेकांवर ओरडत आहेत.
डॉनच्या बातमीनुसार, पीटीआय-समर्थित पीएमएल-क्यूचे चौधरी परवेझ इलाही आणि पीएमएल-एनचे हमजा शाहबाज यांच्यासमवेत राज्य विधानसभा सभागृहाच्या नवीन नेत्याची निवड करणार होती. यादरम्यान एकच गोंधळ उडाला.
दरम्यान, पीटीआयचे माजी माहिती सचिव उमर सरफराज चीमा यांना पंजाबचे नवे राज्यपाल बनवण्यात आले आहे.
पाकिस्तानातील संपूर्ण विरोधक इम्रान खानविरोधात एकवटले आहेत. रविवारी, पाकिस्तानच्या नॅशनल असेंब्लीमध्ये इम्रान सरकारविरोधातील अविश्वास प्रस्तावावर मतदान होणार होते, परंतु स्पीकरनेच हा प्रस्ताव फेटाळून लावला. यानंतर विरोधकांनी संसदेत प्रचंड गदारोळ केला आणि स्वतःचा सभापती निवडला. दुसरीकडे, इम्रान खान यांच्या शिफारशीवरून राष्ट्रपतींनी पाकिस्तानची संसद बरखास्त केली. सध्या पाकिस्तानचे सरकार बरखास्त झाले असून इम्रान खान काळजीवाहू पंतप्रधानपदाची सूत्रे हाती घेत आहेत. दुसरीकडे हे प्रकरण सर्वोच्च न्यायालयात पोहोचले आहे.
