धोनीचा सणसणीत 'षटकार'

इंडीयन प्रीमीयर लीगसाठी खेळाडूंना करारबद्ध करण्यासाठी बुधवारी (२०) पैशांचा अक्षरशः पाऊस पाडण्यात आला. भारताचा 'वन डे' संघाचा कर्णधार महेंद्रसिंह धोनीला सर्वाधिक म्हणजे सहा कोटी रूपये ओतून चेन्नईच्या संघाने आपल्याकडे खेचून आणले. त्याचवेळी ऑस्ट्रेलियाच्या एंड्र्यू सायमंड्सला दुसर्‍या क्रमांकाची रक्कम म्हणजे तब्बल ५ कोटी चाळीस लाख रूपये देऊन हैदराबादच्या संघाने 'विकत' घेतले.

मुंबईतील ओबेरॉय हिल्टन हॉटेलमध्ये हा लिलाव झाला. वेळ चालेल. यात ७८ खेळाडूंसाठी बोली लावली गेली. श्रीलंकेचा जादुई गोलंदाज मुथय्या मुरलीधरनसाठी २.४ कोटी मोजून चेन्नई संघाला त्याला आपल्याकडे खेचून घेतले. शाहरूखच्या कोलकता संघाने शोएब अख्तरला १.८२ कोटीच्या मोबदल्यात आपल्याकडे वळविले आहे.

ऑस्ट्रेलियाचा माजी लेगस्पीनर शेन वॉर्नसाठी जयपूर संघाने १.८ कोटी रूपेय मोजले. तर फटकेबाजीसाठी प्रसिद्ध असलेला ऑस्ट्रेलिया एडम गिलख्रिस्ट हैदराबादच्या वाट्याला गेला आहे. त्यासाठी २.८ कोटी रूपये मोजण्यात आले.

हैदराबादने धोनीपेक्षा साठ लाख रूपये कमी देऊन सायमंड्सला आपल्याकडे खेचले. ऑस्ट्रेलियन कर्णधार रिकी पॉंटींगला मात्र फारशी 'किंमत' मिळाली नाही. शाहरूखच्या कोलकता संघाने त्याला एक कोटी साठ लाखात आपल्याकडे खेचले. मात्र, त्याचवेळी ब्रेट लीला मोहालीच्या संघाने ३.६ कोटी रूपये देऊन 'खरेदी' केले.

ऑस्ट्रेलियाचा तडाखेबाज फलंदाज मॅथ्यू हेडन धोनीबरोबरच चेन्नई संघात सामील झाला. त्याला दीड कोटी रूपये बोली मिळाली. दिल्ली संघाने तिसर्‍या फेरीत या लिलावात भाग घेऊन न्यूझीलंडचा डावखुरा फिरकी गोलंदाज डॅनियल व्हिट्टोरीला आपल्याकडे ओढले. त्यासाठी त्यांनी अडीच कोटी रूपयेदिले. ब्रॅंडन मॅकमिलन कोलकता संघाकडे गेला. त्याला २.८ कोटी रूपयांची बोली मिळाली. जेकब ओरामला चेन्नईच्या संघाने आपल्याकडे घेतले. त्याच्यासाठी २.७ कोटींची बोली लावण्यात आली होती.

हरभजनसिंग व सनथ जयसूर्याला अनुक्रमे आठ लाख पन्नास हजार व नऊ लाख ७५ हजार डॉलर्स देऊन मुकेश अंबानींच्या मुंबई संघाने आपल्याकडे खेचले. त्याचवेळी विजय मल्ल्या यांच्या बंगलोर संघाने अनिल कुंबळेला ( पाच लाख डॉलर्स) आणि कुमार संगकाराला प्रीती झिंटाच्या मोहाली संघाने (सात लाख डॉलर्स) आपल्याकडे खेचले.

या लिलावासाठी आयपीएलने आठ फ्रॅंचाईझींना कमीत कमी १३२ कोटी रूपये खर्च करण्यास सांगितले होते. त्याचवेळी जास्तीत जास्त खर्चाची मर्यादा २०० कोटी होती.