मुख्य लढत : संजय धोत्रे (भाजप) विरुद्ध हिदायत पटेल (काँग्रेस) विरुद्ध प्रकाश आंबेडकर (वंचित बहुजन आघाडी)
अकोला लोकसभा मतदारसंघात तिरंगी लढत होत आहे. भाजपचे संजय धोत्रे हे विद्यमान खासदार आहेत. तीन वेळा ते अकोला मतदारसंघातून लोकसभेवर निवडून गेलेत. त्यांच्याविरोधात काँग्रेसने हिदायत पटेल यांना निवडणुकीच्या रिंगणात उतरवलं आहे. तर वंचित आघाडीकडून भारिप बहुजन महासंघाचे नेते प्रकाश आंबेडकरही या मतदारसंघातून निवडणूक लढवत आहेत.
लोकसभा निवडणुकीत यावेळी लोकसभेच्या 543 जागांमधून महाराष्ट्रात 48 जागांसाठी मतदान प्रक्रिया पूर्ण झाली. महाराष्ट्रात लोकसभेसाठी चार टप्प्यात मतदान झाले. महाराष्ट्रात पहिल्या टप्प्यातलं मतदान ११ एप्रिलला, दुसऱ्या टप्प्यातलं मतदान १८ एप्रिललला, तिसऱ्या टप्प्यातलं मतदान २३ एप्रिलला आणि चौथ्या टप्प्यातलं मतदान २९ एप्रिलला संपन्न झाले होते. चार टप्प्यात झालेल्या निवडणुकीत सरासरी 60.68 टक्के मतदान झाले. 2014 साली देशात 9 तर महाराष्ट्रात 3 टप्प्यांत मतदान झालं होतं. निवडुणकांचे निकाल 23 मे रोजी जाहीर केले जाणार आहे.
विशेष म्हणजे भारतीय जनता पार्टी आणि शिवसेना यांनी महाराष्ट्रात लोकसभा आणि विधानसभा निवडणुकांसाठी युतीची घोषणा केली. लोकसभेला भाजप 25 आणि शिवसेना 23 मतदारसंघांमधून लढली. तर विधानसभेच्या निवडणुकीत दोन्ही पक्ष निम्म्या-निम्म्या जागा लढवणार आहेत अशी घोषणा करण्यात आली.
इकडे काँग्रेस आणि राष्ट्रवादीने क्रमश: 26 आणि 22 मतदारसंघांमधून आपले उमेदवार उभे केले होते.
