राज्यात त्रिशंकू विधानसभा अस्तित्वात येणार असे भाकीत येथील राजकीय ज्योतिर्विद सिद्धेश्वर मारटकर यांनी नुकतेच व्यक्त केले आहे. पुणे येथे 'ज्योतिषज्ञान' या दिवाळी अंकाच्या प्रकाशनाप्रसंगी आयोजित परिसंवादात ते बोलत होते. राज्यातील विधानसभा निवडणुका आणि वार्षिक राशी भविष्य या विषयांवर या परिसंवादात चर्चा करण्यात आली. ज्योतिषज्ञान या अंकाचे प्रकाशन ज्येष्ठ कृषि तज्ज्ञ बुधाजीराव मुळीक यांच्या हस्ते संपन्न झाले.
येत्या १३ ऑक्टोबरला होणारे मतदान आणि २२ ऑक्टोबरचा निकाल चार ह्या हर्षलच्या प्रभावाखाली लागणार असून विचित्र व अनपेक्षित निकालांची नोंद होणार असल्याचेही मारटकर यांनी म्हटले आहे. पक्ष आणि पक्षनेतृत्वांच्या पत्रिकांचा विचार करता, काँग्रेस-राष्ट्रवादीची परिस्थिती गत लोकसभेच्या तुलनेत खराब दर्शविते. त्यामुळे २००४ च्या इतक्या जागा राखण्यातही अडचणी येई शकतील. तिसरी आघाडी आणि बंडखोरीमुळे काँग्रेस-राष्ट्रवादीच्या जागा कमी होऊ शकतात असेही त्यांनी सांगितले.
शिवसेना-भारतीय जनता पक्षांसंदर्भात मारटकर म्हणाले की, बाळासाहेब ठाकरे, उद्धव ठाकरे यांची पत्रिका निवडणूक काळात सुधारत असून सेनेच्या जागा वाढण्याची शक्यता आहे. मात्र भाजपाच्या जागा कमी होऊन युतीला सत्तेपर्यंत जाणे अवघड असल्याचेही त्यांनी सांगितले.
याउलट कॉंग्रेस-राष्ट्रवादीचे संख्याबळ कमी झाले तरी बंडखोर, तिसरी आघाडी व महाराष्ट्र नवनिर्माण सेना यासारख्या पक्षांची मदत घेऊन सत्ता मिळविण्यात आघाडीला यश मिळू शकते. मात्र त्यासाठी सत्तेतील महत्त्वांच्या पदावर तडजोड करावी लागेल आणि परिणामी राज्यात अस्थिर सरकार स्थापन होण्याची शक्यता सिद्धेश्वर मारटकर व्यक्त केली.
दरम्यान, या परिसंवादानंतर ज्योतिष परीक्षेतील उत्तीर्ण विार्थ्यांचा मान्यवरांच्या हस्ते पदवीप्रदान करण्यात आले. कार्यक्रमाचा प्रारंभ पुरोहित शहरकर गुरूजी व सहकारी यांच्या मंत्र पठणाने झाला.
