Share Market Update : महाराष्ट्र विधानसभा निवडणुकीत भाजपच्या नेतृत्वाखालील आघाडीचा दणदणीत विजय आणि बड्या कंपन्यांच्या समभागांची खरेदी यामुळे देशांतर्गत शेअर बाजारात सोमवारी जोरदार तेजी दिसून आली. महायुतीच्या विजयामुळे गुंतवणूकदारांनी 2 दिवसांत शेअर बाजारात 13 लाख कोटी रुपयांची कमाई केली. सेन्सेक्स जवळपास 993 अंकांनी तर निफ्टी 315 अंकांनी वाढला.
30 समभागांवर आधारित बीएसईचा बेंचमार्क निर्देशांक सेन्सेक्स मागील सत्रातील वाढ कायम ठेवत 992.74 अंकांनी किंवा 1.25 टक्क्यांनी वाढून 80,109.85 अंकांवर बंद झाला. व्यापारादरम्यान तो 1,355.97 अंकांनी वाढून 80,473.08 अंकांवर पोहोचला होता.
नॅशनल स्टॉक एक्सचेंज (NSE) चा मानक निर्देशांक निफ्टी 314.65 अंकांनी किंवा 1.32 टक्क्यांनी वाढून 24,221.90 अंकांवर पोहोचला. सेन्सेक्स कंपन्यांमध्ये लार्सन अँड टुब्रो, स्टेट बँक ऑफ इंडिया (एसबीआय), अदानी पोर्ट्स, रिलायन्स इंडस्ट्रीज, पॉवर ग्रिड, आयसीआयसीआय बँक, एचडीएफसी बँक, टाटा कन्सल्टन्सी सर्व्हिसेस (टीसीएस), कोटक महिंद्रा बँक आणि ॲक्सिस बँक यांचे शेअर्स सर्वाधिक वाढले.
दुसरीकडे, जेएसडब्ल्यू स्टील, टेक महिंद्रा, इन्फोसिस, मारुती सुझुकी, एशियन पेंट्स आणि एचसीएल टेक यांच्या समभागांमध्ये घसरण झाली. दरम्यान, 23 डिसेंबरपासून JSW स्टीलच्या जागी BSE सेन्सेक्स समूहात ऑनलाइन केटरिंग पुरवठादार Zomato चा समावेश करण्याचा निर्णय घेण्यात आला आहे. BSE ची उपकंपनी, Asia Index Pvt Ltd ने जाहीर केलेल्या नवीनतम सेन्सेक्स रीअलाइनमेंटचा हा भाग आहे.
जिओजित फायनान्शिअल सर्व्हिसेसचे मुख्य गुंतवणूक रणनीतीकार व्ही.के. विजयकुमार म्हणाले की, शुक्रवारी निफ्टी 557 अंकांनी वाढून सर्वांना आश्चर्यचकित करण्याची क्षमता बाजाराने दाखवली होती आणि महाराष्ट्रात भाजपच्या नेतृत्वाखालील आघाडीच्या उत्कृष्ट कामगिरीच्या जोरावर हा कल कायम राहिला. या निवडणुकीचा व्यापक राजकीय संदेश आहे आणि बाजाराच्या दृष्टीकोनातून ती अत्यंत सकारात्मक आहे.
शनिवारी जाहीर झालेल्या महाराष्ट्र निवडणूक निकालात भाजपने चमकदार कामगिरी केली आहे. भाजपच्या नेतृत्वाखालील महायुती आघाडीने विक्रमी जागा जिंकून सत्तेत पुनरागमन केले आहे. आशियातील इतर बाजारांत दक्षिण कोरियाचा कोस्पी आणि जपानचा निक्केई वधारून बंद झाला, तर चीनचा शांघाय कंपोझिट आणि हाँगकाँगचा हँग सेंग घसरला.
दुपारच्या व्यवहारात युरोपीय बाजार तेजीत होते. शुक्रवारी अमेरिकन बाजार सकारात्मक क्षेत्रात बंद झाले. जागतिक तेल बेंचमार्क ब्रेंट क्रूड 0.40 टक्क्यांनी घसरून $74.87 प्रति बॅरलवर आले. शेअर बाजाराच्या आकडेवारीनुसार, परदेशी संस्थागत गुंतवणूकदारांनी (FII) शुक्रवारी 1,278.37 कोटी रुपयांच्या समभागांची निव्वळ विक्री केली.
शुक्रवारी BSE सेन्सेक्स 1,961.32 अंकांनी वधारून 79,117.11 अंकांवर आणि निफ्टी 557.35 अंकांनी वधारून 23,907.25 अंकांवर बंद झाला.
