इंदूर- न्यूझीलंडविरुद्धच्या कोलकाता आणि कानपूर कसोटीत अपयशी ठरलेल्या टीम इंडियाचा कर्णधार विराट कोहलीने इंदोर कसोटीत सगळी कसर भरून काढत द्विशतकाला गवसणी घातली. विशेष म्हणजे, कर्णधार म्हणून दोन द्विशतके झळकावणारा कोहली हा एकमेव भारतीय क्रिकेटवीर आहे. उपकर्णधार अजिंक्य रहाणेनेही 150 धावांचा पल्ला पार करून त्याला तगडी साथ दिली.
कोहली-राहाणेने चौथ्या विकेटसाठी सर्वात मोठी भागीदारी रचली आहे. त्यांनी 365 धावांचा डोंगर रचत मास्टर ब्लास्टर सचिन तेंडुलकर आणि व्हीव्हीएस लक्ष्मण यांचा 353 धावांचा विक्रम त्यांनी मोडला.
