गाझियाबादमधील इंदिरापुरम पोलिस ठाण्यात क्रिकेटपटू यश दयालविरुद्ध एफआयआर दाखल करण्यात आला आहे. एका तरुणीने क्रिकेटपटूवर लैंगिक शोषणाचा आरोप केला आहे. यशने लग्नाचे आमिष दाखवून तिच्यासोबत अनेकवेळा शारीरिक संबंध ठेवले असा आरोप तरुणीने केला आहे. त्यानंतर यशने तिच्याशी लग्न करण्यास नकार दिला.
सीएम पोर्टलवर तक्रारीनंतर पोलीस सक्रिय
सोमवारी इंदिरापुरम पोलिस ठाण्यात आयपीएल चॅम्पियन रॉयल चॅलेंजर बंगळुरूचा वेगवान गोलंदाज यश दयालविरुद्ध एफआयआर दाखल करण्यात आला. इंदिरापुरम परिसरातील रहिवासी असलेल्या पीडित तरुणीने लग्नाचे आमिष दाखवून लैंगिक शोषण केल्याचा आरोप करत तक्रार दाखल केली आहे. पीडित तरुणीने काही दिवसांपूर्वी आयजीआरएस पोर्टलद्वारे मुख्यमंत्र्यांकडे या प्रकरणाची तक्रार केली होती. तेव्हापासून पोलिस या प्रकरणाची चौकशी करत होते. सोमवारी पोलिसांनी तक्रारीच्या आधारे एफआयआर नोंदवला. या प्रकरणाची चौकशी सुरू असल्याचे पोलिसांचे म्हणणे आहे. तपासानंतर समोर येणाऱ्या तथ्यांच्या आधारे कारवाई केली जाईल.
५ वर्षांपासून प्रेमसंबंध होते
मुलीने पोलिसांना सांगितले की ती सोशल मीडियाद्वारे यश दयालला भेटली. यानंतर दोघांमध्ये मैत्री झाली. हळूहळू दोघांमध्ये प्रेमसंबंध निर्माण झाले. पीडितेचा आरोप आहे की, यादरम्यान यशने लग्नाच्या बहाण्याने तिच्याशी अनेक वेळा शारीरिक संबंध ठेवले. दीर्घकाळ रिलेशनशिपमध्ये असताना यशने तिच्या कुटुंबाला आर्थिक मदतही केली. यशने तिला अनेक वेळा बंगळुरू आणि उटी येथेही घेऊन गेल्याचा आरोप पीडितेने केला आहे. गेल्या ५ वर्षांपासून दोघांमध्ये संबंध असल्याचे पीडितेने पोलिसांना सांगितले.
Edited By- Dhanashri Naik
