IND vs PAK:भारतीय क्रिकेट संघाचा कर्णधार रोहित शर्माने पाकिस्तानविरुद्धच्या आशिया चषकाच्या सुपर-4 सामन्यात शानदार फलंदाजी केली. रोहितने 49 चेंडूत 56 धावांची खेळी खेळली. या काळात त्याने सहा चौकार आणि चार षटकार मारले. रोहितने एकदिवसीय कारकिर्दीतील 50 वे अर्धशतक पूर्ण केले. अशी कामगिरी करणारा तो भारताचा आठवा फलंदाज ठरला आहे. भारतीय कर्णधाराने पाकिस्तानचा वेगवान गोलंदाज शाहीन आफ्रिदीविरुद्धही एक खास विक्रम केला. शाहीन आफ्रिदीच्या पहिल्याच षटकात षटकार मारणारा तो आंतरराष्ट्रीय क्रिकेटच्या कोणत्याही फॉरमॅटमधील पहिला फलंदाज ठरला.
केआर प्रेमदासा स्टेडियमवर नाणेफेक जिंकून फलंदाजी करण्याचा निर्णय घेतला. रोहित आणि शुभमन गिल यांनी टीम इंडियाला शानदार सुरुवात करून दिली. या दोघांनी पहिल्या विकेटसाठी 16.4 षटकात 121 धावांची भागीदारी केली. शुभमन गिलने 52 चेंडूत 58 धावांची खेळी केली. त्याने आपल्या खेळीत 10 चौकार मारले. गिलचे हे वनडेतील आठवे अर्धशतक आहे.
रोहितशिवाय भारताच्या आणखी सात फलंदाजांनी 50 किंवा त्याहून अधिक अर्धशतके झळकावली आहेत. या यादीत महान खेळाडू सचिन तेंडुलकरचे नाव अग्रस्थानी आहे. सचिनच्या नावावर 96 अर्धशतके आहेत. त्याच्यानंतर माजी कर्णधार आणि विद्यमान प्रशिक्षक राहुल द्रविड दुसऱ्या स्थानावर आहे. द्रविडच्या खात्यात 83 अर्धशतके आहेत.
रोहित शर्मा आणि शुभमन गिल यांनी आशिया चषकात सलग दुसऱ्या सामन्यात भारतासाठी शतकी भागीदारी करत आशिया चषकातील सचिन-कोहलीच्या विक्रमाची बरोबरी केली आहे. दोघांनी नेपाळविरुद्ध 147 धावा जोडल्या होत्या. पाकिस्तानविरुद्धच्या या सामन्यात 121 धावांची भागीदारी केली. भारतासाठी आशिया कपमध्ये सर्वाधिक शतकी भागीदारी करणाऱ्या जोडींमध्ये रोहित आणि गिलची जोडी संयुक्तपणे पहिल्या स्थानावर पोहोचली आहे. या दोघांपूर्वी सचिन तेंडुलकर आणि विराट कोहली या जोडीने दोन शतकी भागीदारी आपल्या नावावर नोंदवली होती.
