भारत आणि श्रीलंका यांच्यातील तीन टी-२० सामन्यांची मालिका 3 जानेवारीपासून सुरू होत आहे. त्यासाठी काही दिवसांत संघ निवडला जाऊ शकतो. श्रीलंकेविरुद्धच्या टी-20 मालिकेत भारतीय कर्णधार रोहित शर्माला खेळवण्याचा निर्णय झालेला नाही. त्याच्या बोटाची दुखापत अद्याप बरी झालेली नाही. अशा परिस्थितीत अष्टपैलू हार्दिक पांड्या कर्णधारपद भूषवताना दिसु शकतो.
टी-20 संघात सलामीवीर फलंदाज केएल राहुलचे स्थानही निश्चित झालेले नाही. त्यामुळे त्याला श्रीलंकेविरुद्धच्या मालिकेतून वगळले जाऊ शकते, असे मानले जात आहे. या फॉरमॅटमध्ये राहुलचा अलीकडचा फॉर्म खूपच खराब राहिला आहे. गेल्या सहा डावांत त्याने दोन अर्धशतके झळकावली आहेत, पण दोन्हीही तुलनेने कमकुवत संघाविरुद्ध. राहुलने पाकिस्तानविरुद्ध चार, नेदरलँडविरुद्ध नऊ, दक्षिण आफ्रिकेविरुद्ध नऊ, बांगलादेशविरुद्ध ५०, झिम्बाब्वेविरुद्ध ५१ आणि इंग्लंडविरुद्ध पाच धावा केल्या.
श्रीलंकेविरुद्धच्या मालिकेसाठी संघाची निवड चेतन शर्मा यांच्या अध्यक्षतेखालील राष्ट्रीय निवड समिती करेल. टी-20 विश्वचषकात भारतीय संघाच्या खराब कामगिरीमुळे ही निवड समिती हटवण्यात आली होती, मात्र नवीन निवड समितीची घोषणा होण्यास एक आठवडा लागू शकतो. निवड समितीच्या सदस्यांची निवड करण्यासाठी क्रिकेट सल्लागार समिती (CAC) 26 ते 28 डिसेंबर दरम्यान उमेदवारांची मुलाखत घेईल अशी अपेक्षा आहे.
विराट कोहलीलाही टी-20फॉरमॅटमधून काही दिवस विश्रांती दिली जाऊ शकते. रोहितच्या अनुपस्थितीत हार्दिकने यापूर्वीच भारतीय संघाचे नेतृत्व केले आहे. अलीकडेच त्याने न्यूझीलंडविरुद्धच्या टी-20 मालिकेत भारतीय संघाचे नेतृत्व केले.
हार्दिक पांड्याने इंडियन प्रीमियर लीग 2022 मध्ये गुजरात टायटन्सचे नेतृत्व केले, त्याने 15 सामन्यांमध्ये 44.27 च्या सरासरीने 487 धावा केल्या. यामध्ये चार अर्धशतकांचा समावेश होता.
