IND vs ZIM Live Score 3rd ODI:भारत आणि झिम्बाब्वे यांच्यातील तीन एकदिवसीय मालिकेतील शेवटचा सामना हरारे स्पोर्ट्स क्लब येथे खेळला गेला, ज्यामध्ये सिकंदर रझा (115) च्या शतकानंतरही भारताने 13 धावांनी सामना जिंकला.या विजयानंतर भारताने तीन एकदिवसीय सामन्यांच्या मालिकेत 3-0 असा क्लीन स्वीप केला. भारतीय कर्णधार केएल राहुलने नाणेफेक जिंकून फलंदाजीचा निर्णय घेतला आणि भारताने झिम्बाब्वेसमोर विजयासाठी 290 धावांचे लक्ष्य ठेवले.टीम इंडियाने 8 गड्यांच्या मोबदल्यात 289 धावा केल्या.प्रत्युत्तरात सिकंदर रझा (115) याच्या शतकानंतरही झिम्बाब्वेचा संघ 49.3 षटकांत 276 धावांत सर्वबाद झाला.
इनोसंट काया (6), शॉन विल्यम्स (45), टोनी मुन्योंगा (15), रेगिस चकाबावा (16), ताकुडझ्वानाशे केटानो (13), रायन बर्ल (8) आणि लूक जोंगवे (14) यजमानांना फारसे काही करता आले नाही. , सिकंदर रझाने एकट्याने आघाडी घेत आपले शतक पूर्ण केले आणि ब्रॅड इव्हान्सच्या साथीने नवव्या विकेटसाठी 104 धावांची शतकी भागीदारी केली.सिकंदर रझा मात्र संघाच्या विजयाचा सिकंदर बनू शकला नाही.त्याने 95 चेंडूंत नऊ चौकार आणि तीन षटकारांच्या मदतीने 115 धावा केल्या.
तत्पूर्वी, केएल राहुल आणि शिखर धवन ही सलामीची जोडी मैदानात आली, दोन्ही खेळाडूंनी भारताला चांगली सुरुवात करून दिली.दोन्ही खेळाडूंची अर्धशतकी भागीदारी 79 चेंडूत पूर्ण झाली.भारताला पहिला धक्का केएल राहुलच्या रूपाने 63 धावांवर बसला.भारतीय कर्णधार 46 चेंडूत 30 धावा करून पॅव्हेलियनमध्ये परतला.त्याला अव्हान्सने बोल्ड केले.आता धवनला पाठिंबा देण्यासाठी शुभमन गिल आला.
भारताला दुसरा धक्का उपकर्णधार शिखर धवनच्या रूपाने बसला, तो 68 चेंडूत 40 धावा करत ब्रॅड इव्हान्सच्या चेंडूवर शॉन विल्यम्सकरवी झेलबाद झाला.त्यांच्यानंतर शुभमन गिल आणि इशान किशन यांनी तिसऱ्या विकेटसाठी 140 धावांची शतकी भागीदारी केली.अर्धशतक झळकावल्यानंतर इशान किशन धावबाद झाला.तो बाद झाल्यानंतर शुभमन गिलने 82 चेंडूत 12 चौकारांच्या मदतीने वनडेतील पहिले शतक पूर्ण केले.भारताने पूर्ण 50 षटके खेळून 8 गड्यांच्या मोबदल्यात 289 धावा केल्या.शुभमन गिलने 130 धावांची शतकी खेळी केली.गिलने 97 चेंडूत 15 चौकार आणि 1 षटकार ठोकला.झिम्बाब्वेमध्ये कोणत्याही भारतीय फलंदाजाने केलेली ही सर्वोत्तम धावसंख्या आहे.झिम्बाब्वेकडून ब्रॅड इव्हान्सने 10 षटकात 54 धावा देत 5 बळी घेतले.
