संजू सॅमसनला पाठिंबा दिल्याबद्दल माजी भारतीय क्रिकेटपटू एस श्रीशांतला किंमत मोजावी लागली आहे. केरळ क्रिकेट असोसिएशनने (केसीए) या माजी गोलंदाजावर राज्याच्या क्रिकेट प्रशासकीय मंडळाविरुद्ध खोटे आणि अपमानजनक विधान केल्याचा आरोप केला आहे.
श्रीशांतने अलीकडेच एका मल्याळम टीव्ही चॅनेलवरील पॅनेल चर्चेदरम्यान राज्य क्रिकेट संघटना आणि सॅमसनशी संबंधित प्रकरणावर भाष्य केले होते. त्यानंतर केसीएने भारतीय संघासह दोनदा विश्वचषक जिंकणाऱ्या श्रीशांतला कारणे दाखवा नोटीस बजावली आहे. या संघटनेविरुद्ध दिशाभूल करणारे आणि अपमानास्पद टिप्पण्या केल्याबद्दल त्यांना ही नोटीस पाठवण्यात आली आहे.
एका टीव्ही चर्चेदरम्यान श्रीसंतने सॅमसनला पाठिंबा देण्याचे आश्वासन दिल्याचे वृत्त आहे. राज्य संघात सॅमसनची निवड न केल्याबद्दल त्याने केसीएवर टीका केली आणि त्याचे आणि केरळच्या इतर खेळाडूंचे संरक्षण करण्याचे आश्वासन दिले. विजय हजारे ट्रॉफीसाठी केरळ संघातून भारतीय टी-२० संघाच्या यष्टीरक्षकाला वगळल्याबद्दल राज्य क्रिकेट बोर्डावर टीका होत असताना श्रीशांतने हे वक्तव्य केले आहे.
केसीएने म्हटले आहे की श्रीशांत हा केरळ क्रिकेट लीग फ्रँचायझीचा सह-मालक आहे आणि केसीएविरुद्ध अपमानास्पद टिप्पणी करणे हे कराराचे उल्लंघन आहे. "केरळ क्रिकेट असोसिएशन नेहमीच त्यांच्या खेळाडूंच्या पाठीशी उभी राहिली आहे," असे निवेदनात म्हटले आहे.
