भारतीय क्रिकेट नियामक मंडळाने (BCCI) रविवारी इंडियन प्रीमियर लीग (IPL) 2025 चे वेळापत्रक जाहीर केले. पहिला सामना गतविजेत्या कोलकाता नाईट रायडर्स आणि रॉयल चॅलेंजर्स बंगळुरू यांच्यात ईडन गार्डन्सवर खेळला जाईल. या स्पर्धेचा 18 वा हंगाम 22 मार्चपासून सुरू होईल.
अंतिम सामना 25 मे रोजी ईडन गार्डन्सवर खेळला जाईल. 23 मार्च रोजी आयपीएलचा एल क्लासिको म्हणजेच मुंबई इंडियन्स आणि चेन्नई सुपर किंग्ज यांच्यातील सामना खेळला जाईल. 65 दिवसांत 13 ठिकाणी 10 संघांमध्ये एकूण 74सामने खेळवले जातील. यामध्ये नॉकआउट फेऱ्यांचाही समावेश आहे. या काळात 22 मार्च ते 18 मे या कालावधीत 70 लीग फेरीचे सामने खेळवले जातील. त्याच वेळी, अंतिम सामन्यासह सर्व प्लेऑफ सामने 20 ते 25 मे दरम्यान खेळवले जातील.
22 मार्च रोजी बेंगळुरू आणि कोलकाता यांच्यातील सामन्यानंतर, डबल हेडर सामना रविवार, 23 मार्च रोजी खेळला जाईल. रविवारी, पहिल्या डबल हेडरच्या पहिल्या सामन्यात, सनरायझर्स हैदराबादचा सामना राजस्थान रॉयल्सशी होईल, तर दुसऱ्या सामन्यात मुंबई संघ चेन्नईशी सामना करेल. आयपीएल 2025 मध्ये एकूण 12 डबल हेडर आहेत. डबल हेडरच्या दिवशी, पहिला सामना दुपारी 3:30 वाजता आणि दुसरा सामना संध्याकाळी 7:30 वाजता खेळला जाईल.
आयपीएलच्या दहा संघांपैकी तीन संघ प्रत्येकी दोन होम ग्राउंडवर सामने खेळतील. दिल्ली आपले होम सामने विशाखापट्टणम आणि नवी दिल्लीतील अरुण जेटली स्टेडियमवर खेळेल. राजस्थान त्यांचे दोन घरचे सामने गुवाहाटीमध्ये खेळेल, जिथे ते केकेआर आणि सीएसकेचे आयोजन करतील. याशिवाय, उर्वरित घरचे सामने जयपूरमधील सवाई मानसिंग स्टेडियममध्ये खेळवले जातील. दुसरीकडे, पंजाब चंदीगडमधील नवीन पीसीए स्टेडियमवर आपले चार होम मॅच खेळेल, तर धर्मशाळेतील हिमाचल प्रदेश क्रिकेट असोसिएशन स्टेडियम लखनौ, दिल्ली आणि मुंबईविरुद्ध तीन होम मॅच खेळेल.
लीग स्टेज संपल्यानंतर, हैदराबाद आणि कोलकाता येथे प्लेऑफ सामने खेळवले जातील. हैदराबाद 20 मे 2025आणि 21 मे रोजी क्वालिफायर 1 आणि एलिमिनेटरचे आयोजन करेल. त्यानंतर कोलकाता 23 मे 2025 रोजी क्वालिफायर 2 आणि 25 मे रोजी अंतिम सामना आयोजित करेल.
