पुढील वर्षी 7 फेब्रुवारीपासून भारत आणि श्रीलंकेत होणाऱ्या 2026 च्या पुरुष टी20 विश्वचषकासाठी तिकिटांची विक्री गुरुवारी संध्याकाळी सुरू झाली. आंतरराष्ट्रीय क्रिकेट परिषदेने (ICC) सांगितले की, विक्री भारतीय वेळेनुसार संध्याकाळी 6:45 वाजता सुरू होईल.
तिकीट विक्रीच्या पहिल्या टप्प्यात चाहते निवडक भारतीय स्टेडियममध्ये तिकिटे खरेदी करू शकतील. तिकीट विक्रीच्या दुसऱ्या टप्प्याच्या तारखा लवकरच जाहीर केल्या जातील. ही स्पर्धा भारत आणि श्रीलंकेतील आठ स्टेडियममध्ये खेळवली जाईल.
आयसीसीचे मुख्य कार्यकारी अधिकारी संजोग गुप्ता म्हणाले, "तिकीट विक्रीचा पहिला टप्पा हा आतापर्यंतचा सर्वात सुलभ आणि जागतिक आयसीसी कार्यक्रम आयोजित करण्याच्या आमच्या प्रवासातील एक महत्त्वाचा टप्पा आहे. आयसीसी पुरुष टी20 विश्वचषक 2026साठी आमचे ध्येय स्पष्ट आहे: प्रत्येक चाहत्याला, त्यांची पार्श्वभूमी, स्थान किंवा आर्थिक स्थिती काहीही असो, स्टेडियममध्ये जागतिक दर्जाचे क्रिकेट अनुभवण्याची संधी मिळाली पाहिजे."
स्पर्धेच्या पहिल्या टप्प्यात, गट अ मध्ये भारत, पाकिस्तान, अमेरिका, नेदरलँड्स, नामिबिया यांचा समावेश आहे. गट ब मध्ये श्रीलंका, ऑस्ट्रेलिया, आयर्लंड, झिम्बाब्वे, ओमान यांचा समावेश आहे. गट क मध्ये इंग्लंड, वेस्ट इंडिज, बांगलादेश, नेपाळ, इटली यांचा समावेश आहे. गट ड मध्ये न्यूझीलंड, दक्षिण आफ्रिका, अफगाणिस्तान, कॅनडा, युएई यांचा समावेश आहे. स्पर्धेतील २० संघांना प्रत्येकी चार अशा पाच गटात विभागण्यात आले आहे. प्रत्येक गटातील अव्वल दोन संघ सुपर एट टप्प्यात जातील, जिथे त्यांना पुढे चार अशा दोन गटात विभागले जाईल.
