वेलवेट : एक बोल्ड फॅब्रिक
सध्या काही जुन्या फॅशन नव्यानं परत येऊ लागल्या आहेत. वेलवेट ही त्यातलीच एक आकर्षक फॅशन. वेलवेटचा ड्रेस किंवा वेलवेटची पँट असं साधं डोळ्यासमोर आणलं, तरी ही फॅशन काहींना नकोशी वाटते. साहजिकच आहे, कारण वेलवेट बोल्ड फॅब्रिक म्हणूनच ओळखलं जातं. ते बेतानं घातलं, तरच उठून दिसतं. अन्यथा झँकीपँकी असा ठपका लागायला वेळ लागत नाही. म्हणूनच तर वेलवेटची फॅशन कॅरी करायला धाडस लागतं. वेलवेटचा कपडा परिधान केल्यास श्रीमंती लूक येतो. तो घालताना काही गोष्टी काळजीपर्वूक टाळल्या पाहिजेत आणि पाळल्याही पाहिजेत. गळ्यापासून पायापर्यंत वेलवेट फॅब्रिक वापरून ड्रेस शिवू नये. एकावेळी वेलवेटचा एकच प्रकार अंगारव ठेवा. आधी म्हटल्याप्रमाणे हे बोल्ड फॅब्रिक असल्यानं संपूर्ण शरीरभर ते चांगल दिसत नाही. पाहाणारा एकदम दोन पावलं मागे जाण्याची शक्यता असते! चुडीदार शिवताना बाह्या आणि ओढणीच्या किनारीलाच वेलवेटची लेस लावा किंवा डिझाइन करा. कुडत्याच्या शेवटलाही वेलवेटचा पॅच लावता येईल.
वेस्टर्न वन पीस घालणार असाल, तर गुडघ्यापर्यंतच त्यांची उंची ठेवा. पोटरीपर्यंत मिडी नकोच. हा पॅटर्न स्लिव्हलेस ठेवा. पूर्ण बाह्या नकोतच, मिडी वेलवेटचा आणि गळा तसंच बाह्या नेटच्या शिवण्याचीही फॅशन आहे. ज्यांना एकदम वेलवेट घालण्याचं धाडत होत नसेल, त्यांनी आधी वेलवेटच्या अ‍ॅक्सेसरीज घालून पाहा. उदा. हेअरबँड, हँडपर्स, शूज, बेल्ट इत्यादी.
