तुमच्या चित्रपटाचं संगीत वैशिष्ट्यपूर्ण असतं. 'सावरखेड'चं संगीत आजही गाजतं आहे. 'सनई चौघडे'त संगीताचं काही वेगळेपण आहे काय? पाटील- नक्कीच आहे. यावेळी मी प्रथमच अवधूत गुप्तेबरोबर काम करतोय. या चित्रपटात अवधूतच्या स्टाईलचं एक गाणं आहे. हे रॉकी गाणं तरूणांना नक्कीच आवडल्याशिवाय रहाणार नाही. सुनिधी चौहान या निमित्ताने मराठीत गाते आहे. एकुणात संगितात काही तरी वेगळं देण्याचा प्रयत्न केला आहे. संगीताबरोबरच मी सगळ्या बाबींकडे जाणीपवूर्क लक्ष देतो. कारण चित्रपट परिपूर्ण हवा अशी माझी इच्छा असते. याशिवाय त्यात काही वेगळेपण असावं असाही माझा प्रयत्न असतो. चित्रपटाच्या निर्मिती प्रक्रियेत श्रेयस तळपदे आहे? पण 'स्टार कास्ट'मध्ये त्याचं नाव दिसत नाही. चित्रपटात तो कलावंत म्हणून आहे की नाही? पाटील (हसत हसत) - हा एक सस्पेन्स आहे. तो आहेही आणि नाहीही. त्यामुळे ते पडद्यावर प्रत्यक्ष पाहिल्यावरच कळेल. इतर कलावंतांबरोबरचा अनुभव कसा होता?पाटील- शिल्पा तुळसकर आणि तुषार दळवी या ज्येष्ठ कलावंतांसोबत काम करण्यास मी स्वतः खूप उत्सुक होतो. कारण हे दोघेही ताकदीचे कलावंत आहेत. त्यामुळे त्यांच्याबरोबर काम करण्याचा माझा अनुभव अतिशय चांगला होता. या कलावंतांचं वैशिष्ट्य म्हणजे ते चित्रपटात मोठ्या प्रमाणात गुंततात आणि हवी ती सगळी मदत करतात. याशिवाय या चित्रपटात मी नवोदित पाच अभिनेते आणि अभिनेत्रींना संधी दिली आहे. यांना आपण कोणत्या ना कोणत्या चॅनेलवर पहातोच. पण आता त्यांना या चित्रपटाच्या निमित्ताने एक चांगला प्लॅटफॉर्म मिळाला आहे. चित्रपटाचं शूटींग कुठे झालं? पाटील- बहुतांश शूटींग पुण्यात झालं. काही मुंबईत झालं.
मुक्ता आर्ट्स हे बॅनर मराठीत उतरल्याने चित्रनिर्मितीत किती फरक पडू शकतो?
पाटील- नक्कीच. वास्तविक मी 'सावरखेड' केला त्यावेळीही आधुनिक तंत्रज्ञान वापरलं होतं. त्यानंतर मग तांत्रिकदृष्ट्या चांगले सिनेमेही आले. पण यावेळी मात्र मुक्ता आर्ट्सबरोबर काम केल्यामुळे अतिशय उच्च दर्जाच्या तांत्रिक पाठबळावर मी हा चित्रपट केला. त्यामुळे निर्मितीमुल्यात नक्कीच फरक पडला. मुक्ता आर्ट्स एका प्रादेशिक भाषेत चित्रपट बनविते ही फार मोठी गोष्ट आहे. त्यामुळे मराठीचा चेहरा मोहराही बदलू शकतो.
शेवटचा प्रश्न. सावरखेड एक थरार-रहस्यपट होता. मध्ये एक पौराणिक चित्रपटही केला. एका संताच्या चित्रपटावरही तुम्ही काम करता आहात. आणि 'सनई चौघडे' हा पुन्हा वेगळा चित्रपट. हे वैविध्य कसे काय?
पाटील- मी आतापर्यंत पाच चित्रपट केले आहेत. हे सगळे वेगळे आहेत. वेगळ्या विषयांचे, पार्श्वभूमीचे आहेत. मला वेगळं काही तरी करायला आवडतं. प्रत्येक चित्रपटाची चित्रभाषा वेगळी आहे. सध्या मी सयाजी शिंदेबरोबर एक फिल्म करतो आहे. शिवाय संत तुकडोजी महाराजांवरही चित्रपटाचे काम सुरू आहे. 'सनई चौघडे' तर पूर्णपणे 'सोशल' फिल्म आहे. थोडक्यात मला तेच तेच करायचा कंटाळा येतो. काही तरी नवीन करावंसं वाटतं. आणि तीच माझी उर्जा आहे.
