पहिल्या दिवशी झाली नोटबंदी
देशभक्तीची चढली सर्वांना धुंदी
काळ्या पैश्याची सापडेना मुंडी
जो बाळा जो जो रे जो sss
दुस-या दिवशी आला आदेश
रांगेत उभा अवघा हा देश
भक्तगणांचा भारी जल्लोष
जो बाळा जो जो रे जो sss
तिस-या दिवशी वाढला ताण
चलनाची सर्वत्र झाली चणचण
प्रधानसेवक जाती जापान
जो बाळा जो जो रे जो sss
चवथ्या दिवशी नवा कहर
नोट काढली दोन हजार
सुटे मिळेना झालो बेजार
जो बाळा जो जो रे जो sss
पाचव्या दिवशी पाचावर धारण
रांगेत आले अनेकांना मरण
काळा पैसा तरी येईना शरण
जो बाळा जो जो रे जो sss
सहाव्या दिवशी संताप संताप
नव्या नियमांचा नवाच ताप
गडकरी वाड्यात लग्न थाटात
जो बाळा जो जो रे जो sss
सातव्या दिवशी काय सांगू कथा
संपेना सा-या देशाची व्यथा
एटीएम पुढे फोडतो माथा
जो बाळा जो जो रे जो sss
आठव्या दिवशी क्याशलेसचा मंत्र
फडणवीस घेती डिजिटल संत्र
गरीब शोधतो भाकरीचा चंद्र
जो बाळा जो जो रे जो sss
नवव्या दिवशी नवल घडे
नव्या नोटांचे घबाड सापडे
भ्रष्टाचाराला गाडला का रे ?
जो बाळा जो जो रे जो sss
आता होतील दिवस पन्नास
आठवले मला आश्वासन खास
मिळेल का दिलासा आता देशास ?
जो बाळा जो जो रे जो sss
