सजलो तुझ्यासाठीच
हसलो तुझ्यासाठी ।।
खेळात रंगतांना
हरलो तुझ्यासाठीच.....
नशिबात व्हायचे ते
मी भोगले कधीचे ।।
चटके उन्हातले मी
साहतो तुझ्याचसाठी.....
जेव्हा कधी तुझ्याशी
वाटे रमून जावे ।।
तुडवित खाच खळगे
येतो तुझ्याचसाठी ....
जाऊ नको मला तू
सोडून दूरदेशी ।।
जे मागशील मजला
देतो तुझ्याचसाठी...
स्वप्नातल्या सुखांना
सजवू नको कधीही ।।
प्रत्यक्ष मीच आता
येतो तुझ्यासाठीच...
आला वसंत फुलूनी
बहरात यौवनांच्या ।।
हृदयातल्या गीतांना
गातो तुझ्यासाठी....
