साहित्य: 2 वाटी मैदा, साजूक तूप, मीठ, वेलची पूड, चिमूटभर सोडा, आवडत असल्यास खाण्याचा रंग, आणि मैदा भिजवण्यापूरते दूध, पाकासाठी 2 वाटी साखर, थोडा खोबर्याचा खिस.कृती:
पाक तयार करण्यासाठी एका भांड्यात 2 वाटी पाणी आणि 2 वाटी साखर घालून ते चांगले उकळवा. एकतारी पाक तयार झाला की गॅस बंद करा. त्यानंतर प्रथम मैद्यात चवीपुरते मीठ, वेलची पूड, चिमूटभर सोडा आणि 1/2 वाटी तूपाचे मोहन घालून ते मिश्रण चांगले एकजीव करावे. दूधाने ते मिश्रण पोळीच्या पिठासारखे मळून घ्यावे, हवे असल्यास खाण्याचा रंग दूधात मिसळून घ्या.
त्या पिठाचे मध्यम आकाराचे गोळे करुन त्याची पोळी लाटून घ्या, नंतर त्या लाटलेल्या पोळीवर कोमट तूप लावून त्या पोळीचा रोल तयार करा. तयार केलेल्या रोलचे समान आकारात चाकूने तुकडे करून घ्या त्या तुकड्यांना पुन्हा थोडेसे लांबट आकारात हलक्या हाताने चिरोटे लाटा हे चिरोटे तूपात छान खरपूस तळून घ्या, ते तळलेले चिरोटे आता तयार पाकात सोडा 1 ते 2 तास भिजू द्या. हे चिरोटे वाटीत घालून त्यावर खोबर्याचा खिस भुरकवा आणि वाढा.
