उन्हाळ्यात काहीतरी नवीन आणि 'रॉयल' Rose Pistachio Cheesecake Ice Cream

उन्हाळ्याचा तडाखा वाढला की काहीतरी थंड आणि गोड खाण्याची इच्छा होते. तसेच गुलाब पिस्ता चीजकेक आईस्क्रीम हे एक फ्युजन डेझर्ट आहे, जे सध्याच्या काळात खूप लोकप्रिय होत आहे. चीजकेकची 'क्रीमी' आणि थोडीशी 'टँगी' चव जेव्हा गुलाब आणि पिस्त्याच्या स्वादासोबत मिळते, तेव्हा ते अतिशय 'लक्झरी' वाटते.

साहित्य-

क्रीम चीज: २०० ग्रॅम (मऊ केलेले)

हेवी व्हिपिंग क्रीम: १.५ कप (थंड)

कंडेन्स्ड मिल्क: १ कप

गुलाबाचे सरबत: ३-४ मोठे चमचे

पिस्ता: १/४ कप (बारीक चिरलेले)

मॅरी किंवा डायजेस्टिव्ह बिस्किटे ५-६ (क्रश केलेली - चीजकेकच्या 'बेस'साठी)

वाळलेल्या गुलाबाच्या पाकळ्या सजावटीसाठी

कृती- 

१. चीजकेक बेस तयार करा

एका बाऊलमध्ये मऊ केलेले क्रीम चीज आणि कंडेन्स्ड मिल्क एकत्र करून ते स्मूथ होईपर्यंत फेटून घ्या. यातच गुलाबाचे सरबत घाला, ज्यामुळे मिश्रणाला छान गुलाबी रंग आणि सुगंध येईल.

२. क्रीम व्हिप करा

दुसऱ्या थंड बाऊलमध्ये व्हिपिंग क्रीम घेऊन ती घट्ट होईपर्यंत फेटून घ्या. क्रीमची मात्रा दुप्पट झाली पाहिजे.

३. मिश्रण एकत्र करा

व्हिप केलेली क्रीम आता क्रीम चीजच्या मिश्रणात हळूहळू 'फोल्ड' करा. खूप जोरात हलवू नका, अन्यथा क्रीममधील हवा निघून जाईल आणि आईस्क्रीम मऊ होणार नाही.

४. लेअरिंग 

आता एका डब्यात थोडे आईस्क्रीम मिश्रण टाका, त्यावर बिस्किटांचा चुरा, पिस्त्याचे काप आणि थोडे गुलकंद (पर्यायी) टाका. अशाच प्रकारे २-३ लेअर्स करा. यामुळे खाताना अगदी 'चीजकेक' खाल्ल्यासारखा फील येईल.

५. सेट करणे

वरून उरलेले पिस्ते आणि गुलाबाच्या पाकळ्या टाकून डबा व्यवस्थित बंद करा. ८-१० तास फ्रीझरमध्ये सेट होऊ द्या. क्रीम चीजमुळे याला नेहमीच्या आईस्क्रीमपेक्षा अधिक दाट आणि मखमली टेक्सचर मिळते. तसेच बिस्किटांचा चुरा आणि पिस्त्याचा 'क्रंच' चवीत विविधता आणतो. गुलाबाचा नैसर्गिक सुगंध उन्हाळ्याच्या संध्याकाळी मनाला प्रसन्न करतो.

जर तुम्हाला आईस्क्रीम अजून जास्त स्टायलिश बनवायचे असेल, तर हे मिश्रण 'आईस्क्रीम मोल्ड्स' मध्ये सेट करा आणि वरून व्हाईट चॉकलेटमध्ये बुडवून त्यावर पिस्ता शिंपडा. हे दिसायला एखाद्या महागड्या बुटीक आईस्क्रीमसारखे दिसेल!

Edited By- Dhanashri Naik