मानवी तस्करीच्या संशयावरून फ्रान्समध्ये थांबलेले विमान 276 प्रवाशांसह मंगळवारी मुंबईत पोहोचले. 303 प्रवाशांसह हे विमान संयुक्त अरब अमिरातीतून फ्रान्समध्ये आले होते आणि ते निकाराग्वाला जाणार होते.
अमेरिकेत जाण्यासाठी बेकायदेशीर स्थलांतरितांकडून निकाराग्वाचा वापर केला जातो. विमानातील बहुतांश प्रवासी भारतीय होते. या प्रकारच्या बेकायदेशीर प्रवासाला 'डंकी उड्डाण' म्हणतात. हा शब्द पंजाबमध्ये गुपचूप अमेरिका किंवा कॅनडामध्ये जाणाऱ्या लोकांसाठी वापरला जातो.
अलीकडेच या विषयावर शाहरुख खान स्टारर 'डंकी' चित्रपटही प्रदर्शित झाला आहे. रोमानियन चार्टर कंपनी लीजेंड एअरलाइन्सद्वारे चालवलेले A340 विमान मंगळवारी पहाटे 4 वाजता मुंबईच्या छत्रपती शिवाजी आंतरराष्ट्रीय विमानतळावर उतरले. पॅरिसजवळील विट्री विमानतळावरून याने दुपारी 2.30 वाजता (स्थानिक वेळेनुसार) उड्डाण केले आणि 276 प्रवासी घेऊन गेले. फ्रान्स सरकारने दोन प्रवाशांना ताब्यात घेतले आहे. दोन अल्पवयीन मुलांसह 25 जणांनी फ्रान्समध्ये आश्रय मागितला आहे.
त्यांना चार्ल्स डी गॉल विमानतळावरील विशेष भागात हलवण्यात आले आहे. गुरूवारी 11 अल्पवयीन मुलांसह 303 प्रवाशांना घेऊन जाणाऱ्या विमानाला फ्रेंच अधिकाऱ्यांनी मानवी तस्करीच्या संशयावरून वात्री विमानतळावर थांबवले.
केंद्रीय औद्योगिक सुरक्षा दलाच्या (CISF) अधिकाऱ्यांनी मुंबईत आलेल्या 276 प्रवाशांपैकी काहींची चौकशी केली. कोणत्याही प्रवाशांना ताब्यात घेतले नाही आणि सर्व 276 लोकांना सकाळी 11.30 पर्यंत विमानतळ सोडण्याची परवानगी देण्यात आली.
माध्यमांपासून बचावलेले प्रवासी
पीटीआयच्या म्हणण्यानुसार, मुंबई विमानतळावर थांबलेल्या प्रसारमाध्यमांनी वारंवार प्रयत्न करूनही, एकाही प्रवाशाने त्याच्या प्रवासाबद्दल किंवा गेल्या चार दिवसात घडलेल्या घटनांबद्दल बोलले नाही.
विमान उतरल्यानंतर काही तासांनंतर प्रवासी मीडियाला सामोरा न जाता विमानतळाच्या बाहेर जाताना दिसले.
