मध्य प्रदेशातील व्यावसायिक परीक्षा मंडळाच्या कथित घोटाळ्यातील सबंधितांचे मृतदेह सापडण्याची मालिका सुरु असल्याने या प्रकरणातील गुढ वाढत चालले आहे. प्रशिक्षणार्थी पोलीस उपनिरीक्षक म्हणून रुजू झालेल्या महिलेचा मृतदेह आढळल्याने खळबळ उडाली आहे.
व्यापमंची परीक्षा उत्तीर्ण होऊन प्रशिक्षणार्थी पोलीस उपनिरीक्षक म्हणून रुजू झालेली अनामिका सिकरवार (२५) हिचा मृतदेह आढळून आला. ती सागर जिल्ह्यातील पोलीस प्रशिक्षण अकादमीत वास्तव्याला होती. तिचा मृतदेह अकादमीलगतच्याच तलावात सापडला.
दरम्यान, मृतदेह सापडण्याच्या या मालिकेमुळे भाजपा सरकार अडचणीत आले असून मुख्यमंत्री शिवराजसिंह चौहान यांना हटविण्याची आणि निष्पक्ष चौकशीची मागणी काँग्रेसने केली आहे. राज्यपाल रामनरेश यादव यांना पदावरून हटवून चौकशीची मागणी करणारी याचिका विचारात घेण्याला सर्वोच्च न्यायालयाने सहमती दर्शविल्याने भाजपा सरकारला चांगलाच झटका बसण्याची शक्यता आहे.
