दिल्लीतील साउथ वेस्ट जिल्ह्यातील डियर पार्कमध्ये एका तरुणाचे आणि तरुणीचे मृतदेह झाडाला लटकलेले आढळले. सुरुवातीच्या तपासात हे आत्महत्येचे प्रकरण असल्याचे दिसून येत आहे. या प्रकरणाची चौकशी सुरू असल्याचे पोलिसांनी सांगितले.
डियर पार्कमध्ये एका तरुणाचे आणि तरुणीचे मृतदेह झाडाला लटकलेले आढळल्यानंतर परिसरात खळबळ उडाली. पोलिसांचे पथकही तात्काळ घटनास्थळी पोहोचले. सध्या पोलिसांनी दोन्ही मृतदेह झाडावरून खाली उतरवले आहेत आणि शवविच्छेदनासाठी पाठवले आहेत. पोलिसांनी सांगितले की, कोणतीही सुसाईड नोट सापडलेली नाही. सीसीटीव्ही फुटेज तपासले जात आहे.
सदर प्रकरण दक्षिण दिल्लीतील हौज खास परिसरातील डियर पार्कशी संबंधित आहे. रविवारी सकाळी येथे एका तरुणाचेआणि एका तरुणीचे मृतदेह झाडाला लटकलेले आढळले. या प्रकरणात पोलिसांनी आत्महत्येचा संशय व्यक्त केला आहे. पोलिसांनी दिलेल्या माहितीनुसार, डीअर पार्कमधील एका सुरक्षा रक्षकाने सकाळी 6.31 वाजता पीसीआरला फोन करून मृतदेह सापडल्याची माहिती दिली. पोलिसांनी सांगितले की, मृत तरुण आणि तरुणीचे वय सुमारे 17 वर्षे होते. तरुणाने काळा टी-शर्ट आणि निळा जीन्स घातला होता आणि तरुणीने हिरवे कपडे घातले होते.
मृताची ओळख पटवण्याचे आणि घटनेचे कारण शोधण्याचे प्रयत्न सुरू असल्याचे एका अधिकाऱ्याने सांगितले. आतापर्यंत कोणतीही 'सुसाईड नोट' सापडलेली नाही. पोलिसांनी सांगितले की, घटनास्थळाभोवती बसवलेल्या सीसीटीव्ही कॅमेऱ्यांचे फुटेज स्कॅन केले जात आहे आणि या प्रकरणाचा तपास सुरू आहे. मुलगा आणि मुलगी यांनी एकाच नायलॉन दोरीने झाडाच्या फांदीला गळफास घेतल्याचेही उघड झाले आहे. गुन्हे शाखेच्या पथकालाही घटनास्थळी तपासणीसाठी पाचारण करण्यात आले आहे. पुढील कारवाई केली जात आहे.
