केरळमध्ये एका 14 वर्षाच्या मुलाचा दुर्मिळ संसर्गजन्य आजाराने मृत्यू झाला आहे. मीडिया रिपोर्ट्सनुसार, हा मुलगा काही दिवसांपूर्वी कोझिकोडमधील तलावात आंघोळीसाठी गेला होता, तिथून त्याला धोकादायक मेंदू खाणाऱ्या अमिबाची लागण झाली होती. या दुर्मिळ आणि धोकादायक संसर्गजन्य रोगाला प्राथमिक अमीबिक मेनिंगोएन्सेफलायटीस म्हणतात. प्राइमरी अमेबिक मेनिंगोएन्सेफलायटीस (पीएएम) हा मेंदूचा एक दुर्मिळ आणि घातक संसर्गजन्य रोग आहे, जो सहसा दूषित पाण्याच्या संपर्कात आल्याने होतो, असे तज्ज्ञ सांगतात.
केरळमध्ये गेल्या दोन महिन्यांतील या संसर्गामुळे झालेला हा तिसरा मृत्यू आहे. यापूर्वीही मे-जून महिन्यात दोन मुलींचा मृत्यू झाला होता. सामान्यतः "मेंदू खाणारा अमिबा" म्हणून ओळखला जाणारा, हा संसर्ग नाकातून मेंदूपर्यंत पोहोचतो. हा संसर्ग एका व्यक्तीकडून दुसऱ्या व्यक्तीमध्ये पसरत नाही.
प्राइमरी अमीबिक मेनिंगोएन्सेफलायटीस (PAM) हा Naegleria fowleri नावाच्या अमीबाच्या संसर्गामुळे होतो. हा संसर्ग मेंदूच्या ऊतींचा नाश करू लागतो, ज्यामुळे मेंदूला गंभीर सूज येते आणि बहुतेक प्रकरणांमध्ये मृत्यू होतो.
हा संसर्ग निरोगी मुलं, तरुणांना होऊ शकतो.
संसर्ग झालेल्यांची सुरुवातीची लक्षणे सामान्यतः फ्लूसारखी असतात (जसे की डोकेदुखी, ताप, मळमळ आणि उलट्या). हा रोग जसजसा वाढत जातो तसतसे त्यामुळे होणाऱ्या समस्यांचा धोका वाढतो. या स्थितीत, मेंदूशी संबंधित समस्या जसे की ताठ मान, गोंधळ, फेफरे, कोमा इत्यादींचा धोका असू शकतो. ही लक्षणे सहसा दूषित पाण्याच्या संपर्कात आल्यानंतर एक ते 12 दिवसात सुरू होतात. लक्षणे झपाट्याने विकसित होऊ शकतात आणि पाच ते 18 दिवसांत संसर्ग घातक ठरू शकतो.
केरळमध्ये या संसर्गजन्य आजाराबाबत आरोग्य तज्ज्ञांनी सतर्कतेचा इशारा दिला आहे. आरोग्य विभागाने लोकांना सावध केले आणि सांगितले की मुलांनी तलावात किंवा साचलेल्या पाण्यात आंघोळ करणे टाळावे. जलतरण तलाव आणि वॉटर थीम पार्कमधील पाणी नियमितपणे क्लोरीन करणे देखील महत्त्वाचे आहे. दूषित पाण्याच्या संपर्कात आल्याने हा संसर्ग होण्याचा धोका असतो.
