Kedarnath Helicopter Crash: उत्तराखंडमधील रुद्रप्रयाग येथील गौरीकुंड परिसरात एक मोठी दुर्घटना घडली आहे. रविवारी पहाटे केदारनाथ मार्गावर एक हेलिकॉप्टर कोसळले. हेलिकॉप्टरमध्ये एकूण सात जण होते. या दुर्दैवी अपघातात सर्व सात जणांचा मृत्यू झाला आहे, मृतांमध्ये एका 23 महिन्यांच्या मुलाचाही समावेश आहे. एनडीआरएफ आणि एसडीआरएफ पथके घटनास्थळी रवाना करण्यात आली आहेत.
मिळालेल्या माहितीनुसार, आर्यन कंपनीचे हेलिकॉप्टर रविवारी सकाळी कोसळले. गौरीकुंड परिसरात हा अपघात झाला. ही घटना पहाटे 5.30 वाजता घडल्याचे सांगितले जात आहे. हेलिकॉप्टर अपघाताचे कारण खराब हवामान असल्याचे सांगितले जात आहे.
हेलिकॉप्टर नोडल अधिकारी राहुल चौबे आणि जिल्हा आपत्ती व्यवस्थापन अधिकारी नंदन सिंग राजवार यांनी हेलिकॉप्टर अपघाताची पुष्टी केली आहे. गौरीकुंडच्या वर गवत कापणाऱ्या नेपाळी वंशाच्या महिलांनी हेलिकॉप्टर अपघाताची माहिती दिली.
मिळालेल्या माहितीनुसार, या दुर्दैवी अपघातात सात जणांचा मृत्यू झाला आहे. यामध्ये एक जोडपे आणि त्यांचे २३ महिन्यांचे मूल देखील समाविष्ट आहे. जयस्वाल कुटुंब महाराष्ट्रातील असल्याचे सांगितले जात आहे. यात दोन लोक स्थानिक आहेत, विनोद नेगी आणि विक्रम सिंग रावत यांचा समावेश आहे. विक्रम सिंग रावत हे बीकेटीसीचे कर्मचारी होते.मृतदेह गंभीरपणे जळाल्याचे वृत्त आहे. हेलिकॉप्टर गौरी माई खार्कच्या वरच्या जंगलात कोसळल्याचे सांगण्यात येत आहे.
मुख्यमंत्री पुष्कर सिंह धामी यांनी हेलिकॉप्टर अपघाताबद्दल दुःख व्यक्त केले आहे. त्यांनी ट्विटरवर पोस्ट करत लिहिले की, रुद्रप्रयाग जिल्ह्यात हेलिकॉप्टर अपघाताची अतिशय दुःखद बातमी मिळाली आहे. एसडीआरएफ, स्थानिक प्रशासन आणि इतर बचाव पथके मदत आणि बचाव कार्यात गुंतलेली आहेत. मी सर्व प्रवाशांच्या सुरक्षिततेसाठी बाबा केदारकडे प्रार्थना करतो.
