प्रसिद्ध उद्योगपती मुकेश अंबानी यांच्या घराबाहेर सापडलेल्या स्फोटकांनी भरलेल्या स्कॉर्पिओचे मालक मनसुख हिरेन यांचा मृतदेह ठाण्यातील मुंब्रा रेतीबंदर याठिकाणी सापडला होता. या मनसुख हिरेन यांचा शवविच्छेदनाचा प्राथमिक अहवाल ठाणे पोलिसांमार्फत जाहीर करण्यात आला आहे. मनसुख हिरेन यांचा मृत्यू बुडूनच झाल्याचा अहवाल पोलिसांनी दिला आहे. ठाणे पोलिसांकडून हा अहवाल आता मुंबई पोलिसांना माहितीसाठी पाठवण्यात आला आहे. या शवविच्छेदन अहवाल प्रकरणात ठाणे पोलिसांकडून आणखी एक सल्ला घेण्यात येणार असल्याची माहिती आहे. हिरेन कुटुंबीयांनी शवविच्छेदन अहवाल सार्वजनिक करण्याची मागणी केली होती. तसेच हिरेन कुटुंबीयांनी या शवविच्छेदन प्रक्रियेतील व्हिडिओ फुटेजची मागणी केली होती. अॅटॉप्सी अहवाल, त्यांच्या मृत्यूचे नेमके कारण काय आहे याची माहिती द्यावी अशी मागणी कुटूंबीयांनी केली होती.
