पुणे :विमाननगर परिसरातील ललवाणी प्लाझा येथे झेपटो कंपनीच्या गोदामाजवळ असलेल्या वेगवेगळया कार्यालयात ये-जा करणाऱ्या महिलांची छेड काढल्याप्रकरणी कंपनीच्या मॅनेजरसह चार ते पाच डिलिव्हरी बॉयवर गुन्हा दाखल करण्यात आला आहे. याप्रकरणी विमानतळ पोलीस ठाण्यात 48 वषीय महिलेने तक्रार दाखल केली आहे.
झेपटो कंपनीचे मॅनेजर सुरज गायकवाड (वय 35), स्टोअर मॅनेजर मोईन हन्नुरे (33) व इतर अनोळखी चार ते पाच डिलिव्हरी बॉयवर गुन्हा दाखल करण्यात आला आहे. हा प्रकार सन 2022 पासून 29 मे 2023 पर्यंत घडलेला आहे.
तक्रारदार महिला काम करत असलेल्या ऑफिसच्या इमारतीच्या खाली झेपटो कंपनीचे गोदाम आहे. त्याठिकाणी तक्रारदार व त्यांचे सहकारी इतर महिलांसोबत कामावर येत-जात असताना कंपनीचे मॅनेजर व स्टोअर मॅनेजर हे कंपनीत काम करणाऱ्या डिलीव्हरी बॉय यांना चिथवाणी देत व फुस लावत होते. त्यानुसार तक्रारदार व इतर महिला कामावर येता-जाता डिलिव्हरी बॉय त्यांना नेहमी अश्लील भाषा वापरणे, त्यांचा पाठलाग करणे. तसेच जाणीवपूर्वक महिलांसमोर कपडे बदलत स्त्री मनास लज्जा उत्पन्न होईल असे कृत्य करत होते. डिलिव्हरी बॉईजच्या या कृत्याला कंटाळून अखेर या महिलांनी पोलिसात धाव घेतली. याबाबत पुढील तपास पोलीस उपनिरीक्षक एस कोळळुरे करत आहेत.
Edited By- Ratnadeep Ranshoor
