पुणे-सोलापूर महामार्गावर भीषण अपघात; इको कारची टेम्पोशी टक्कर झाल्याने तीन जणांचा मृत्यू

पुणे-सोलापूर महामार्गावरील इंदापूरजवळ झालेल्या भीषण अपघातात तीन जणांचा मृत्यू झाला तर एक गंभीर जखमी झाला आहे. इंदापूर तालुक्यातील दलाच क्रमांक २ परिसरात गुरुवारी सायंकाळी ५ वाजण्याच्या सुमारास हा अपघात झाला. इंदापूर येथे झालेल्या अपघातात इको कारमध्ये प्रवास करणाऱ्या सहा प्रवाशांपैकी तिघांचा जागीच मृत्यू झाला. मृत सर्व सोलापूर जिल्ह्यातील सांगोला येथील रहिवासी होते. इको कारचा चालक हा अपघातात गंभीर जखमी झाला असून त्याच्यावर उपचार सुरू आहे.

मिळालेल्या माहितीनुसार, सोलापूर-पुणे लेनवर प्रवास करणाऱ्या आयशर टेम्पोचा  अचानक टायर फुटला. त्यानंतर चालकाने टेम्पो महामार्गाच्या बाजूला उभा केला. दरम्यान, मागून येणाऱ्या मारुती सुझुकी इको कारच्या चालकाचे वाहनावरील नियंत्रण सुटले आणि तो पार्क केलेल्या टेम्पोला आदळला. घटनेची माहिती मिळताच भिगवण पोलिस घटनास्थळी पोहोचले. भिगवण पोलिस सध्या या प्रकरणात गुन्हा दाखल करत आहे.  

Edited By- Dhanashri Naik