महाराष्ट्रातील धाराशिव शहरात (उस्मानाबाद) होळीच्या दिवशी दोन गटात जोरदार हाणामारी झाली. सोमवारी रात्री अज्ञात कारणावरून दोन समुदाय आमनेसामने आले आणि हाणामारीनंतर दगडफेक झाल्याचे सांगण्यात येत आहे. मात्र पोलिस तात्काळ घटनास्थळी पोहोचले आणि त्यांनी तातडीने कारवाई केली. जमावाला पांगवण्यासाठी आणि परिस्थिती नियंत्रणात आणण्यासाठी अश्रुधुराच्या नळकांड्या फोडण्यात आल्या.
धाराशिवमधील खाजा नगर आणि गणेश नगर परिसरात ही घटना घडली. हिंसक जमावाने केलेल्या दगडफेकीमुळे अनेक वाहने आणि दुकानांचे नुकसान झाले. तर 4-5 जण जखमी झाल्याचंही वृत्त आहे. सध्या शहरातील परिस्थिती नियंत्रणात आहे. मात्र तणावाच्या पार्श्वभूमीवर परिसरात मोठा पोलीस बंदोबस्त तैनात करण्यात आला आहे. SRPF, QRT आणि RCB देखील तैनात करण्यात आले आहेत.
परिस्थिती सामान्य झाल्याचे पोलीस अधिकाऱ्याने सांगितले. एका यूट्यूब चॅनलच्या पत्रकारावर जमावाला भडकवल्याचा आरोप आहे. आरोपी पत्रकाराला अटक करण्यात आली आहे.
धाराशिव शहरात सोमवारी रात्री दोन समाजात काही कारणावरून वाद झाला. काही वेळातच हाणामारी सुरू झाली. यानंतर दोन्ही समाजाचे लोक समोरासमोर आले आणि दगडफेक सुरू झाली. दरम्यान घटनेची माहिती मिळताच स्थानिक पोलीस घटनास्थळी दाखल झाले. मात्र मोठी गर्दी असल्याने अधिक पोलिस बंदोबस्त मागवण्यात आला.
प्रकरणाचे गांभीर्य पाहून पोलीस अधीक्षक (एसपी) अतुल कुलकर्णी स्वत: घटनास्थळी पोहोचले. जमावाला पांगवण्यासाठी पोलिसांनी अश्रुधुराचे तीन शेल फेकले. त्यानंतर परिस्थिती नियंत्रणात आली.
याप्रकरणी धाराशिव शहर पोलिस ठाण्यात गुन्हा दाखल करण्यात आला आहे. पोलिसांनी 125 हून अधिक लोकांविरुद्ध कलम 307 आणि इतर आयपीसी कलमांतर्गत गुन्हा दाखल केला आहे. किमान तीन जणांना अटक करण्यात आली असून उर्वरित हल्लेखोरांचा शोध सुरू आहे.
आता परिस्थिती पूर्णपणे नियंत्रणात असल्याचे अधिकाऱ्यांनी सांगितले. आरोपींचा शोध सुरू असून त्यांना लवकरच अटक करण्यात येईल. याप्रकरणी पोलिसांनी यूट्यूब चॅनलचे पत्रकार अल्ताफ शेख यालाही अटक केली आहे. शेखवर जमावाला भडकवल्याचा आरोप आहे. पोलीस प्रत्येक कोनातून या प्रकरणाचा तपास करत आहेत. नागरिकांनी शांतता राखावी आणि अफवांवर विश्वास ठेवू नये, असे आवाहन पोलिसांनी केले आहे.
