"महाविकास आघाडीची अवस्था सध्या अशी झालीय की, प्रत्येक विभागाचे एकेक राजे आणि प्रत्येक विभागात एकेक सचिन वाझे आहे," अशी टीका माजी मुख्यमंत्री आणि विधानसभेतील विरोधी पक्षनेते देवेंद्र फडणवीस यांनी केली. एबीपी माझानं ही बातमी दिलीय.
प्रत्येक मंत्री स्वत:ला मुख्यमंत्री समजतो, असा टोलाही देवेंद्र फडणवीसांनी लगावला आहे.
मुंबईत भाजपच्या महाराष्ट्र प्रदेश कार्यसमितीची बैठक पार पडली. या बैठकीच्या समारोपाचं भाषण देवेंद्र फडणवीस यांनी केलं.
महाराष्ट्रातील कोव्हिडच्या स्थितीबाबतही फडणवीसांनी महाविकास आघाडीवर टीका केली.
फडणवीस म्हणाले, "महाराष्ट्राचे मॉडेल हे मृत्यूच्या सापळ्याचे मॉडेल आहे. या सरकारसाठी मुंबईच्या बाहेर महाराष्ट्र आहे तरी काय? एकतरी जंबो कोव्हिड सेंटर मुंबईच्या बाहेर उघडले आहे का?"
उत्तर प्रदेशातील गंगेतील मृतदेहांची चर्चा करणारे बीडमध्ये 27 मृतदेहांची जी विटंबना झाली, त्याबाबत चकार शब्द काढत नाहीत, असंही फडणवीस म्हणाले.
