Nagpur news: बांगलादेशातील अस्थिरतेनंतर त्या देशातील नागरिक भारतात घुसखोरी करत आहे. या पार्श्वभूमीवर महाराष्ट्रात दहशतवाद विरोधी पथक (एटीएस) सक्रिय झाले आहे. तसेच एटीएस नागपूरसह संपूर्ण राज्यात अशा घुसखोरांचा शोध घेत आहे. त्याअंतर्गत एटीएसने गेल्या तीन दिवसांपासून नागपुरात शोधमोहीम राबवून संशयितांना अटक करण्यास सुरुवात केली आहे.
मिळालेल्या माहितीनुसार एटीएसकडून संशयितांची कसून चौकशी केली जात आहे. बांगलादेश आणि महाराष्ट्रासह भारतात अस्थिरता निर्माण करण्याचा कट देशविरोधी संघटना रचत असल्याच्या संशयावरून ही तपास मोहीम सुरू करण्यात आली आहे.
बांगलादेशातून बंगाल आणि अन्य मार्गाने भारतात घुसखोरी होत आहे. येथून हे घुसखोर भारतातील विविध राज्यात जातात. ते तिथे मजूर म्हणून काम करतात. एटीएसने अशा लोकांवर लक्ष केंद्रित केले आहे. पहिल्या दिवशी एटीएसच्या पथकाने इतवारी आणि परिसरातून सुमारे 35 संशयितांना ताब्यात घेतले. दुसऱ्या दिवशी मिहानमधील विविध बांधकाम स्थळांवरून 15 जणांना ताब्यात घेण्यात आले. पोलिसांनी या 50 संशयितांची 6-7 तास कसून चौकशी केली.
काही लोकांकडे आधार कार्ड आणि ओळखपत्र आढळून आले. त्याआधारे ते खरोखरच त्या ठिकाणचे नागरिक आहेत का, याची तपासणीही एटीएसने सुरू केली आहे. त्यांच्याकडे असलेले आधार कार्ड आणि ओळखपत्र बनावट असल्याचे निदर्शनास येताच एटीएस त्यांना पकडण्यासाठी मोहीम राबवणार आहे.
नागपूर शहर पोलीसही अलर्ट मोडवर
बांगलादेशी घुसखोरांचा तपास करण्यासाठी एटीएसप्रमाणेच नागपूर पोलीसही सतर्क आहे. स्थानिक पोलिसांनीही शहरातील विविध भागात चौकशीचे सत्र सुरू केले आहे. व्हिसा घेऊन शहरात आलेले लोक आता काय करत आहेत, त्यांच्या व्हिसाची मुदत संपली आहे का, याचा तपास पोलीस करत आहेत. याशिवाय बांधकाम करणाऱ्या कंत्राटदारांकडून कामगारांच्या नावांची यादी मागविण्यात आली आहे. कामगार कुठून आले याची संपूर्ण माहिती गोळा केली जात आहे. पाकिस्तान, इराण, अफगाणिस्तानसह बांगलादेशातून येणाऱ्या लोकांचीही कसून चौकशी केली जात आहे.
