महाराष्ट्रातील नाशिक जिल्ह्यात वर्षाच्या पहिल्याच दिवशी एक मोठी घटना घडली आहे. इगतपुरी येथील पॉली फिल्म इंडस्ट्रीला रविवारी सकाळी 11 वाजता भीषण आग लागली. या आगीच्या भक्ष्यस्थानी अनेक मजूर आणि कारखान्यातील कामगार जखमी झाले आहेत. नाशिकचे सिव्हिल सर्जन अशोक थोरात यांनी सांगितले की, आगीच्या घटनेत जखमी झालेल्या 9 जणांना शहरातील खासगी रुग्णालयात दाखल करण्यात आले आहे.
नाशिक महानगरपालिका आणि सर्व प्रमुख उद्योगांच्या अग्निशमन दलाच्या गाड्या घटनास्थळी दाखल झाल्या आहेत. अग्निशमन दलाच्या अनेक गाड्या घटनास्थळी आग विझवण्याचे काम करत आहेत. आगीची माहिती घेण्यासाठी जिल्हाधिकारी गंगाधरन डी आणि पोलीस अधीक्षक शाहजी उमप यांच्यासह वरिष्ठ अधिकारीही आगीच्या ठिकाणी पोहोचले आहेत.
नाशिक महानगरपालिकेच्या अग्निशमन अधिकाऱ्यांनी सांगितले की, आग मोठ्या प्रमाणात पसरत आहे. कारखान्यात उपलब्ध असलेल्या कच्च्या मालाच्या प्रकारामुळे आग सतत पसरत आहे. आग विझवण्यासाठी थोडा वेळ लागू शकतो. सध्या आगीचे कारण समजू शकलेले नाही.
जिंदाल ग्रुपची ही कंपनी इगतपुरीतील मुंढेगावजवळ असल्याचे अधिकाऱ्यांनी सांगितले. सकाळी 11 च्या सुमारास कारखान्यात मोठा स्फोट होऊन येथे आग लागली. येथे उपस्थित कामगारांना काही समजेपर्यंत आग पसरू लागली. अनेकांना आगीने विळख्यात घेतले.
दरम्यान, घटनास्थळी बचावकार्य सुरू असून या घटनेने परिसरात खळबळ उडाली आहे. परिसरात घबराटीचे वातावरण आहे. कंपनीची परिस्थिती गंभीर असून आगीमुळे कारखान्यात वारंवार स्फोट होत आहेत.
