बाबा सिद्दीकी हत्या प्रकरणात मोठी कारवाई; मुंबई पोलिसांनी सुरक्षा रक्षक श्याम सोनावणे यांना बडतर्फ केले

मुंबई पोलिसांनी बाबा सिद्दीकी हत्या प्रकरणात त्यांचे सुरक्षा रक्षक श्याम सोनावणे यांना बडतर्फ करून मोठी कारवाई केली आहे. ते कर्तव्यात कसूर आणि निष्काळजीपणासाठी दोषी आढळले.

राष्ट्रवादी काँग्रेसचे माजी नेते बाबा सिद्दीकी यांच्या खळबळजनक हत्या प्रकरणात मुंबई पोलिसांनी कठोर शिस्तभंगाची कारवाई केली आहे. पोलीस प्रशासनाने सिद्दीकी यांच्या सुरक्षेत तैनात असलेले कॉन्स्टेबल श्याम सोनावणे यांना अधिकृतपणे सेवेतून बडतर्फ केले आहे. त्या रात्री सुरक्षा व्यवस्थेत गंभीर चुका आणि निष्काळजीपणा झाल्याच्या आरोपांची विभागीय चौकशी झाल्यानंतर ही कारवाई करण्यात आली.

मुंबई पोलिसांच्या म्हणण्यानुसार, कॉन्स्टेबल श्याम सोनावणे हे सुरक्षा शाखेत तैनात होते आणि त्यांच्यावर बाबा सिद्दीकी यांच्या संरक्षणाची जबाबदारी होती. या घटनेनंतर त्यांना निलंबित करण्यात आले आणि त्यांच्याविरुद्ध विभागीय चौकशी सुरू करण्यात आली. चौकशीत कॉन्स्टेबल श्याम सोनावणे हे दोषी आढळले, त्यानंतर त्यांना सेवेतून का काढून टाकू नये, याबद्दल कारणे दाखवा नोटीस बजावण्यात आली. त्यानंतर पोलीस विभागाने त्यांना बडतर्फीचे पत्र दिले, जे त्यांनी २ मे रोजी स्वीकारले. आता त्यांना अधिकृतपणे सेवेतून काढून टाकण्यात आले आहे.

१२ ऑक्टोबर २०२४ च्या रात्री, मुंबईतील वांद्रे परिसरात तीन हल्लेखोरांनी बाबा सिद्दीकी  यांच्यावर गोळ्या झाडल्या. हा हल्ला त्यांचे पुत्र आणि आमदार झीशान सिद्दीकी यांच्या कार्यालयाबाहेरच झाला.  

Edited by-Dhanashri Naik