बीड जिल्ह्यातील मसाजोग येथील सरपंच संतोष देशमुख यांच्या हत्येप्रकरणी एसआयटीचे स्थापन केले असून तपास सुरु झाला आहे. तपास यंत्रणा आपले काम करत आहे. तर सरकार देखील आपल्या बाजूने प्रयत्न करत आहे. या प्रकरणी राज्य सरकारने विशेष सरकारी वकील नेमण्याची तयारी केली आहे.
महाराष्ट्राचे मुख्यमंत्री देवेंद्र फडणवीस यांनी गुरुवारी सांगितले की, त्यांनी ज्येष्ठ वकील उज्ज्वल निकम यांना सरपंच संतोष देशमुख हत्या प्रकरणात विशेष सरकारी वकील बनण्याची विनंती केली आहे.
फडणवीस यांनी प्रसार माध्यमांशी बोलताना सांगितले की, भाजपचे आमदार सुरेश धस यांच्याशी आपण बोललो आहे, ज्यांनी निकम यांची या प्रकरणात विशेष सरकारी वकील म्हणून नियुक्ती करण्याची मागणी करणारे निवेदन त्यांना दिले आहे.
निकम यांनी हा खटला चालवायचा की नाही हे ठरवण्यासाठी काही दिवसांचा अवधी मागितला आहे. देवेंद्र फडणवीस म्हणाले, मी त्यांना हे प्रकरण स्वतःचा हातात घेण्याची विनंती केली आहे. त्यांनी मान्य केले तर आम्ही त्यांची नियुक्ती निश्चितपणे करू.
मुंबईचे सुप्रसिद्ध वकील उज्ज्वल निकम 26/11 दहशतवादी हल्ला आणि 1993 च्या मुंबई बॉम्बस्फोटांसह अनेक मोठ्या खटल्यांमध्ये विशेष सरकारी वकील राहिले आहेत. 26/11 च्या दहशतवादी हल्ल्यातील आरोपी अजमल कसाबला फाशी देण्यात त्यांनी महत्त्वाची भूमिका बजावली होती.
बीडमधील मसाजोग गावचे सरपंच देशमुख यांचे 9 डिसेंबर रोजी पवनचक्की कंपनीकडून खंडणीच्या प्रयत्नाला विरोध केल्यानंतर त्यांचे अपहरण करून त्यांची हत्या करण्यात आली होती. देशमुख यांच्या हत्येचा तपास करण्यासाठी राज्य सरकारने बुधवारी आयपीएस अधिकारी बसवराज तेली यांच्या नेतृत्वाखाली विशेष तपास पथक (एसआयटी) स्थापन केले.
राष्ट्रवादीचे मंत्री धनंजय मुंडे यांचे सहकारी वाल्मिक कराड यांच्यावरही देशमुख यांच्या हत्येचा गुन्हा दाखल करण्यात यावा, अशी मागणी विरोधक आणि सत्ताधारी पक्षाचे आमदार करत आहेत.
