शरद पवार अजित पवार यांचे अपूर्ण राहिलेले स्वप्न पूर्ण करणार! विलीनीकरणावर चर्चा होणार

बारामतीचा किल्ला वाचवण्यासाठी शरद पवार यांनी २० मे रोजी एक महत्त्वाची बैठक बोलावली आहे. या बैठकीत अजित पवार यांचे अपूर्ण राहिलेले स्वप्न पूर्ण करण्यावर आणि राष्ट्रवादी काँग्रेसच्या दोन गटांच्या विलीनीकरणावर चर्चा होणार आहे. अशी माहिती समोर आली आहे.

मिळालेल्या माहितीनुसार माजी उपमुख्यमंत्री अजित पवार यांचे अपूर्ण राहिलेले स्वप्न पूर्ण करण्याचे प्रयत्न पुन्हा एकदा सुरू झाले आहे. 'ब्रँड बारामती' आणि पवार कुटुंबाचे राजकीय वर्चस्व टिकवण्यासाठी राष्ट्रवादी काँग्रेस पक्षाच्या दोन गटांच्या पुनर्मिलनाच्या चर्चांना जोर चढला आहे. शरद पवार यांनी २० मे रोजी मुंबईतील वाय. बी. चव्हाण सेंटरमध्ये आपल्या गटातील प्रमुख नेत्यांची तातडीची बैठक बोलावली आहे. पक्षाचे विलीनीकरण आणि कौटुंबिक ऐक्य हा या बैठकीचा मुख्य अजेंडा असेल, असे मानले जात आहे.

माजी उपमुख्यमंत्री अजित पवार यांच्या अकाली निधनाच्या काही दिवस आधी, दोन्ही गटांच्या विलीनीकरणाची चर्चा जवळपास अंतिम टप्प्यात पोहोचली होती, असा दावा शरद पवार गटाने केला आहे. कुटुंबातील या फुटीचा फायदा कोणताही तिसरा पक्ष घेऊ नये, अशी स्वतः अजित पवार यांची इच्छा होती. विलीनीकरणाच्या औपचारिक घोषणेचीही चर्चा होती, पण विमान अपघाताने सर्व काही बदलून टाकले. आता, शरद पवार यांना ती चर्चा तार्किक निष्कर्षापर्यंत न्यायची आहे.

तीन दिवसांपूर्वी, राष्ट्रवादी काँग्रेसचे ज्येष्ठ नेते आणि खासदार सुनील तटकरे यांनी शरद पवार यांची त्यांच्या निवासस्थानी भेट घेतली. मिळालेल्या माहितीनुसार, तटकरे गेल्या अनेक दिवसांपासून शरद पवार यांच्या भेटीची वेळ मागत होते, परंतु प्रकृती अस्वास्थ्यामुळे त्यांना भेटता आले नव्हते.

Edited By- Dhanashri Naik