Sharad Pawar On Baramati By Election 2026 शरद पवारांचा सल्ला चर्चेत – बारामती निवडणूक बिनविरोध व्हावी का?

Sharad Pawar On Baramati By Election 2026 राज्याचे लक्ष लागलेल्या बारामती विधानसभा पोटनिवडणुकीत आता एक मोठी घडामोड समोर आली आहे. राष्ट्रवादी काँग्रेसचे (शरदचंद्र पवार पक्ष) सर्वेसर्वा शरद पवार यांनी या निवडणुकीबाबत आपली स्पष्ट भूमिका मांडली असून, ही निवडणूक बिनविरोध होणेच योग्य असल्याचे म्हटले आहे.

नेमकं प्रकरण काय?

अजित पवार यांच्या निधनामुळे रिक्त झालेल्या बारामती विधानसभा मतदारसंघासाठी २३ एप्रिल रोजी मतदान होणार आहे. या जागेसाठी महायुतीकडून सुनेत्रा पवार रिंगणात आहेत, तर काँग्रेसने आकाश मोरे यांना उमेदवारी दिली आहे. आज अर्ज मागे घेण्याचा शेवटचा दिवस असल्याने सर्वच पक्षांच्या हालचालींना वेग आला आहे.

शरद पवार काय म्हणाले?

या पोटनिवडणुकीवर भाष्य करताना शरद पवार म्हणाले, "काँग्रेस हा एक राष्ट्रीय पक्ष आहे, त्यामुळे मी त्यांना आदेश देऊ शकत नाही. मात्र एका दुर्दैवी अपघातामुळे ही जागा रिक्त झाली आहे. महाराष्ट्रातील एका कर्तृत्ववान प्रतिनिधीचे निधन झाल्याने ही परिस्थिती ओढवली आहे. अशा वेळी ही निवडणूक बिनविरोध करणेच योग्य ठरेल, असा सल्ला मी काँग्रेसला देईन. निर्णय शेवटी त्यांनीच घ्यायचा आहे."

काँग्रेसची भूमिका अद्याप गुलदस्त्यात

दुसरीकडे, सुनेत्रा पवार यांनी काँग्रेस प्रदेशाध्यक्ष हर्षवर्धन सपकाळ यांच्याशी संपर्क साधून ही निवडणूक बिनविरोध करण्याची विनंती केली आहे. मात्र काँग्रेसने हा निर्णय दिल्लीतील हायकमांडवर सोपवला आहे. 'निवडणूक लढवायची की नाही' याबाबतचा अंतिम निर्णय दिल्लीतून येईल, असे काँग्रेसकडून सांगण्यात येत आहे.

महत्वाच्या तारखा: 

मतदान- २३ एप्रिल २०२६

निकाल- ४ मे २०२६

बारामतीमध्ये आता काँग्रेस माघार घेणार की निवडणूक होणार, याकडे संपूर्ण महाराष्ट्राचे लक्ष लागले आहे. आज दुपारी अर्ज मागे घेण्याची मुदत संपल्यानंतरच यावर शिक्कामोर्तब होईल.