राष्ट्रवादी कॉंग्रेस भाजपला कदापि पाठिंबा देणार नाही, असे स्पष्टीकरण राष्ट्रवादी कॉंग्रेसच्या खासदार सुप्रिया सुळे यांनी दिले आहे. तुळजाभवानीच्या दर्शनासाठी उस्मानाबादमध्ये सुप्रिया सुळे आल्या होत्या यावेळी त्यांनी एका वृत्तवाहिनीला दिलेल्या मुलाखतीत हे स्पष्टीकरण दिले आहे. शिवसेनेचे मंत्री 18 फेब्रुवारी रोजी राजीनामा देणार असल्याची चर्चा सुरु आहे. अशा परिस्थितीत राज्य सरकार अस्थिर होईल. त्यामुळे सरकारला राष्ट्रवादी पाठिंबा देणार का याबाबत प्रश्न विचारला असता, सुप्रिया सुळेंनी आमचा भाजपला पाठिंबा नसल्याचे सांगितले. शरद पवार दोन वर्षांपूर्वी पाठिंबा देण्याचे बोलले होते. त्यानंतर एकदाही बोलले नाहीत. आम्ही कोणाबरोबरही जाणार नाही, असे पवार काही दिवसांपूर्वी बोलले होते, असेही सुप्रिया सुळे यांनी स्पष्ट केले.
