महाराष्ट्रातील गडचिरोली जिल्ह्यात नक्षलवाद्यांनी पुन्हा एकदा भ्याड कृत्य केले आहे. हिंसेचा मार्ग सोडून दिलेल्या एका माजी नक्षलवाद्यावर नक्षलवाद्यांनी घात केला होता. यामध्ये त्यांचा जागीच मृत्यू झाला. पोलिसांनी गुन्हा दाखल करून आरोपींचा शोध सुरू केला आहे.
गडचिरोलीत नक्षलवाद्यांनी काही वर्षांपूर्वी आत्मसमर्पण केलेल्या एका माजी नक्षलवाद्याची हत्या केल्याची माहिती एका अधिकाऱ्याने शुक्रवारी दिली. तो पोलिसांचा खबरी असल्याचा संशय नक्षलवाद्यांना होता. यामुळे त्याला मृत्युदंड देण्यात आला.
जग्गू उर्फ जयराम गावडे असे मृताचे नाव आहे. माजी नक्षलवादी जयराम गावडे गुरुवारी रात्री आरेवाडा-हिद्दूर रस्त्यावरील प्राथमिक आरोग्य केंद्राजवळ पोहोचले असता, नक्षलवाद्यांच्या टोळक्याने त्यांच्यावर हल्ला करून त्यांची हत्या केली.
अधिकृत निवेदनानुसार, गडचिरोली जिल्ह्यातील भामरागड येथील अरेवाडा येथील रहिवासी जयराम गावडे आणि त्यांची पत्नी रासो उर्फ देवे पुंगाटी हे 2007 पासून प्रतिबंधित कम्युनिस्ट पार्टी ऑफ इंडिया (माओवादी) च्या भामरागड 'दलम' चे सदस्य होते. मात्र दोघेही 2017 मध्ये आत्मसमर्पण करून आता शेती करतात.
याप्रकरणी गुन्हा दाखल करण्यात आला असून आरोपींचा शोध सुरू असल्याचे पोलीस अधिकाऱ्याने सांगितले. दुसरीकडे या घटनेने नक्षलग्रस्त भागात खळबळ उडाली आहे.
