उस्मानाबादमध्ये एक धक्कादायक घटना घडली आहे. आर्थिक देवाणघेवाणीच्या वादातून शिक्षकानेच दुसऱ्या शिक्षकाला दगडाने ठेचून खून केला आहे. ही धक्कादायक घटना मंगळवारी सायंकाळी शहरातील भगिरथी कॅालनी परिसरात घडली आहे. या घटनेने शिक्षण क्षेत्रात खळबळ उडाली असून परिसरात भीतीचे वातावरण आहे. श्यामराव देशमुख असे हत्या करण्यात आलेल्या शिक्षकाचे नाव आहे. याप्रकरणी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, शहरातील भोसले हायस्कूलमध्ये श्यामराव देशमुख आणि धीरज हुंबे असे शिक्षक पदावर कार्यरत होते. हे दोघे एकाच शाळेत असल्याने त्यांची एकमेकांसोबत चांगली ओळख आहे. या ओळखीतून दोघांमध्ये आर्थिक देवाणघेवाण सुरू असायची. मात्र, काही व्यवहार फसल्याने दोघांमध्ये सतत वाद होऊ लागले, त्यात त्यांचे घटनेच्या दिवशी तसेच भांडण झाले, मात्र हा वाद एवढ्या विकोपाला गेला की, त्यातून त्यांच्यात मारहाण झाली. यात श्यामराव देशमुख यांना धीरज हुंबे याने दगडाने ठेचून मारायला सुरुवात केली, यात श्यामराव हे गंभीर जखमी झाले होते. त्यांना तत्काळ उस्मानाबादच्या जिल्हा शासकीय रुग्णालयात उपचारासाठी दाखल केले असता, डॉक्टरांनी त्यांना मृत घोषित केले.
या घटनेची माहिती मिळताच घटनास्थळी पोलीस दाखल झाले, त्यांनी घटनास्थळी जाऊन पंचनामा केला आहे. याप्रकरणी मयत शिक्षक श्यामराव देशमुख यांचा मुलगा वैभव देशमुख याने शहर पोलीस ठाण्यात फिर्याद दिली असून पोलिसांनी गुन्हा दाखल केला आहे. पोलीस घटनेचा तपास करत आहेत. मात्र, या घटनेने शिक्षण क्षेत्रात एकच खळबळ उडाली असून अनेकांना धक्का बसलाय.
Edited by: Ratnadeep Ranshoor
