मुंबईचे माजी पोलीस आयुक्त परमबीर सिंग हे अँटालिया प्रकरणातील मास्टरमाइंड आहेत. एनआयएलाही त्याची माहिती आहे. मात्र, या प्रकरणातून परमबीर सिंग यांना वाचवण्याचा केंद्र सरकार आटोकाट प्रयत्न करत आहेत, असा आरोप राष्ट्रवादीचे प्रवक्ते आणि राज्याचे अल्पसंख्याक मंत्री नवाब मलिक यांनी केला आहे. ते मुंबईत बोलत होते.
यावेळी नवाब मलिक (यांनी राष्ट्रीय तपास यंत्रणेसह केंद्रीय यंत्रणांच्या कार्यपद्धतीवर टीका केली. केंद्रीय यंत्रणांचा वापर करुन विरोधकांना दाबण्याचा प्रयत्न होत आहे. संजय राऊत यांच्या निकटवर्तीयांविरुद्धही ईडी याचप्रकारे कारवाई करत आहे. देशभरात केंद्रीय तपास यंत्रणांकडून हेच उद्योग सुरु आहेत. महाराष्ट्रात कितीही दबाव निर्माण केला तरी सरकार झुकत नाही हे पाहून भाजपकडून वेगवेगळे डावपेच खेळले जात आहेत. परंतु, केंद्रातील भाजप सरकारने सत्तेचा कितीही दुरुपयोग केला तरी महाविकासआघाडीच्या तिन्ही पक्षांमधील कोणताही नेता दबावाला बळी पडणार नाही, असे नवाब मलिक (nawab malik) यांनी म्हटले.
‘जिथे परमबीर सिंह जायचे तिथे सचिन वाझे जायचा’
नवाब मलिक यांनी पुन्हा एकदा परमबीर सिंह आणि सचिन वाझे यांच्या कनेक्शनवर बोट ठेवले. सचिन वाझेला पुन्हा पोलीस दलात घेण्याची शिफारस मुख्यमंत्र्यांच्या अधिकारात झालेली नाही. सचिन वाझे पोलीस दलातून निलंबित झाला असला तरी तो परमबीर सिंह यांच्यासाठी काम करत होता. ज्याठिकाणी परमबीर सिंह यांची पोस्टिंग व्हायची, त्याठिकाणी सचिन वाझे असायचा. परमबीर सिंह यांच्यासारख्या पोलीस अधिकाऱ्यांची एक टोळीच होती, असेही नवाब मलिक यांनी म्हटले.
