भाजपचे आमदार आणि नवी मुंबईतील नेते गणेश नाईक यांच्याविरोधात गुन्हा दाखल झाला आहे. सीबीडी पोलीस स्टेशनला दीपा चौहान या महिलेच्या तक्रारीनंतर ठार मारण्याची धमकी दिल्याप्रकरणी गुन्हा दाखल झाला आहे.
27 वर्षांपासून आपण गणेश नाईक यांच्यासोबत लिव्ह-इन रिलेशनशिपमध्ये राहत असल्याचा दावा या महिलेने केला आहे, तसंच या संबंधांमधून झालेल्या मुलाचा स्वीकार करण्यास गणेश नाईक तयार नसल्याचंही महिलेने म्हटलं आहे.
यापूर्वी तक्रारदार महिलेने राज्य महिला आयोगाकडे तक्रार केली होती. आता गणेश नाईक यांच्याविरोधात पोलीस स्टेशनला गुन्हा दाखल झाल्याने त्यांच्या अडचणी आणखी वाढल्या आहेत.
महिला आयोगाच्या अध्यक्षा रुपाली चाकणकर यांनीही यासंदर्भात पोलिसांना अहवाल सादर करण्यास सांगितलं आहे.
