न्यूयॉर्क- भारताच्या सानिया मिर्झा आणि स्वीत्झर्लडची मार्टिना हिंगीस यांनी विम्बल्डनपाठोपाठ अमेरिकन ओपनच्या महिला दुहेरीचे विजेतेपद पटकाण्याचा पराक्रम गाजवला.
सानिया-मार्टिना जोडीने अंतिम सामन्यात ऑस्ट्रेलियाच्या केसी डेलाक्वा आणि कझाकस्तानच्या यारोस्लाव्हा श्वेदोवा जोडीचा 6-3, 6-3 असा सरळ सेट्समध्ये पराभव करून विजय मिळवला. सानिया-मार्टिनाने केवळ 70 मिनिटांत हा सामना जिंकला.
सानिया-मार्टिनाचे यंदाच्या वर्षातले हे सलग दुसरे ग्रँडस्लॅम जेतेपद ठरले. याआधी सानिया-मार्टिना जोडीने विम्बल्डनच्या महिला दुहेरीचे विजेतेपद पटकावले होते. दरम्यान, सानिया मिर्झाचे आपल्या कारकीर्दीतले हे पाचवे ग्रँडस्लॅम विजेतेपद ठरले. सानियाने मिश्रदुहेरीत ऑस्ट्रेलियन, फ्रेंच आणि अमेरिकन ओपन जिंकण्याचा पराक्रम गाजवला आहे.
याआधी हिंगीसने भारताच लीएंडर पेस यांच्या साथीमध्ये अमेरिकन ओपन टेनिस स्पर्धेच मिश्रदुहेरीत संभाव्य विजेत्यांना साजेशी कामगिरी करीत त्यांनी विजेतेपद पटकावले होते.
